قىسقا ازىرلىك باستالدى
«قازاقاۆتوجول» ج ش س باس ديرەكتورى سامات قۋانىش ۇلى كومپانيا يەلىگىندەگى تەحنيكانىڭ جارتىسىن ەسەپتەن شىعارۋ كەرەكتىگىن ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ق ر يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ ۇيىمداستىرۋىمەن وتكەن ZOOM فورماتىنداعى كەڭەستە رەسپۋبليكالىق ماڭىزى بار جولداردى كۇتىپ ۇستاۋ، جاۋاپتى ۆەدومستۆولاردىڭ قىسقى ماۋسىمعا ازىرلىگى تالقىلاندى. كەڭەستە ءسوز العان «قازاقاۆتوجول» ج ش س باس ديرەكتورى سامات قۋانىش ۇلى بيىلعى قىستى ويداعىداي وتكىزۋ ءۇشىن جەكە مەنشىكتەن 400 تەحنيكانى جالعا الۋ تۋرالى كەلىسىمشارت جاسالۋ قاجەتتىگىن اتاپ ءوتتى.
«قازاقاۆتوجولدى» ءتۇرلى مەكەمەلەرگە بەرىپ، تالاي ەكسپەريمەنت جاسالدى. ءقازىر بىزگە 2836 تەحنيكا قاجەت. قولىمىزدا تەك 1117 تەحنيكا بار. ونىڭ 524ء-ى كەيىنگى 3 جىلدان بەرى ەشقانداي جوندەۋ كورمەگەن. ولاردى بالانستان الىپ، ەسەپتەن شىعارۋعا دايىن تۇر. سوندىقتان جوندەۋگە، قوسالقى بولشەكتەر الۋعا 500 ملن تەڭگە ءبولىپ وتىرمىز. بۇل جەكە مەنشىكتە بولعاننىڭ دا اسەرى دەپ ەسەپتەيمىز. ءبىراق بىزگە قوسىمشا بولىنگەن اقشاعا 400 تەحنيكانى جالعا الۋ تۋرالى كەلىسىمشارت جاساۋ ءۇشىن پورتالعا تەندەر شىعاردىق. بۇل ەندى ۇزاقتاۋ پروسەسس»، - دەدى سەرىكتەستىكتىڭ باس ديرەكتورى.
سونداي-اق كومپانيا ەڭبەكاقى 30 پايىزعا ارتقانمەن، بىلىكتى مامانداردى ۇستاپ تۇرۋدا قيىندىق بار ەكەنىن جەتكىزدى.
«سىزدەردىڭ قولداۋلارىڭىزبەن ەڭبەكاقى مولشەرىن 30 پايىزعا كوبەيتتىك. سوندىقتان جۇمىسشىلار تاپشىلىعى ءسال سەيىلدى. ءبىراق جوعارى بىلىكتى مامانداردىڭ كوپتەپ كەتۋى ىقتيمال»، - دەدى سامات قۋانىش ۇلى.