«قازاقفيلم» جانىنداعى «قازاقانيماسيا» شىعارماشىلىق بىرلەستىگى 13 سەريادان تۇراتىن «توقاش پەن باقاش» انيماسيالىق جوباسىن اياقتادى. جوبا بيىل كورەرمەنگە ۇسىنىلماق، دەپ حابارلايدى aqshamnews.kz
سونداي-اق «ۇلتتىق كينونى قولداۋ مەملەكەتتىك ورتالىعىنىڭ» قولداۋىمەن قىسقامەتراجدى «ءۇمىت ءاردايىم جانىمىزدا» جانە تولىقمەتراجدى «التىن ادام» انيماسيالىق فيلمدەرى جارىققا شىعادى.
2024 جىلى قازاق انيماسياسىنىڭ كلاسسيكالىق تۋىندىلارى «اقساق قۇلان»، «اقىل مەن بايلىق»، «قارلىعاشتىڭ قۇيرىعى نەگە ايىر» زاماناۋي فورماتتا جاڭارتىلدى. سونىمەن قاتار، گولليۆۋد ستۋديالارى قازاق تىلىندە دۋبلياجدالعان «ويجۇمباق 2»، «مەن جەكسۇرىن 4»، «موانا 2»، «مۋفاسا: ارىستان پاتشا» جانە «جابايى روبوت» فيلمدەرىن كەڭ پروكاتقا شىعاردى. «كينوپويسك» پلاتفورماسى «گارفيلد» انيماسيالىق ءفيلمىن، ال «Bee TV» «دا ءۆينچيدىڭ تاڭعاجايىپ وقيعالارىن» قازاق تىلىنە اۋدارىپ، ونلاين كورسەتىلىمگە ۇسىندى.
بيىل «قازاقانيماسيا» اياسىندا 10 جاڭا انيماسيالىق جوبا مەن «جىبەك»، «كوماندا ا. ميسسيا ايكا» فيلمدەرىنىڭ ءتۇسىرىلىمى اياقتالادى دەپ جوسپارلانۋدا. سونداي-اق، قازاق كينوسىنىڭ التىن قورىنداعى «اق بوتا» ءفيلمى رەستاۆراسيادان ءوتىپ، جاڭارتىلماق. مەملەكەتتىك قولداۋعا يە بولاتىن جاڭا انيماسيالىق فيلمدەر ۇلتتىق قۇندىلىقتار، اتا-اناعا قۇرمەت، قازاق ەرتەگىلەرى، دوستىق جانە سپورت تاقىرىپتارىنا ارنالادى. قازاق انيماسياسىن دامىتۋ ماقساتىندا 2025 جىلدان باستاپ ارنايى ستراتەگيا ازىرلەنىپ، ونى جەتىلدىرۋ جۇمىستارى جالعاسىن تابادى.