مەديسينا سالاسىنا بولىنگەن قاراجاتتى ءتيىمدى يگەرۋگە ەرەكشە نازار اۋدارۋ قاجەت. بۇل تۋرالى «Jibek Joly» تەلەارناسىنىڭ «ۋادە» باعدارلاماسىنا بەرگەن سۇحباتىندا دەنساۋلىق ساقتاۋ ءمينيسترى اقمارال ءالنازاروۆا ءمالىم ەتتى، دەپ حابارلايدى aqshamnews.kz
- قازىرگى كەزدە پرەزيدەنتتىڭ تاپسىرمالارىن ورىنداۋ تۇرعىسىندا ءمامس جۇيەسىن جەتىلدىرۋ، جەرگىلىكتى اتقارۋشى ورگانداردىڭ حالىقتىڭ دەنساۋلىعىنا قاتىستى جاۋاپكەرشىلىگىن كوتەرۋ ماسەلەسى زاڭ جوباسىندا قامتىلعان. بۇل قۇجاتتا حالىققا مەديسينالىق قىزمەتتىڭ قولجەتىمدىگىن ارتتىرۋ ماسەلەسى قاراستىرىلعان، - دەدى ا.ءالنازاروۆا.
ونىڭ ايتۋىنشا، پرەزدەنتتىڭ سايلاۋالدى باعدارلاماسىندا مەديسينا سالاسىنا بولىنەتىن قاراجاتتىڭ كولەمىن ارتتىرۋ قاراستىرىلدى. بۇل رەتتە ينفراقۇرىلىمدى، جاڭا عيماراتتاردى سالۋعا، مەديسينالىق قىزمەتتەردىڭ ساپاسىن ارتتىرۋ ءۇشىن جاڭا تەحنولوگيالاردى ەنگىزۋگە قوماقتى قاراجات كەرەك.
- اتالعان زاڭ اياسىندا سالاعا بولىنەتىن قاراجاتتى كوبەيتۋ جوسپارلانعان. ەكىنشىدەن، بولىنگەن قاراجاتتى ءتيىمدى يگەرۋگە ەرەكشە نازار اۋدارۋ قاجەت. قازىرگى كەزدە مەملەكەت جاعىنان بولىنگەن قاراجاتتى جانە جۇمىس بەرۋشىلەردىڭ جارناسىن ەسەپكە الساق، 2،8 ترلن تەڭگەگە جەتىپ وتىر. بۇل دا از اقشا ەمەس. وسى قاراجاتتىڭ بەلگىلى ءبىر بولىگى ءتيىمسىز جۇمسالىپ وتىرعانىن كورىپ وتىرمىز. ياعني حالىق ءمامس جۇيەسىنە تولەمدەر اۋدارىلعانىمەن، مەديسينالىق ۇيىمداردا كەزەك ماسەلەسى ءالى دە بار ەكەنىن ايتىپ جاتادى. ءبىز 2024 جىلى بولىنگەن قاراجاتتىڭ تيىمدىلىگىن ارتتىرۋ باعىتىندا جۇمىستاردى اتقاردىق، - دەدى ۆەدومستۆو باسشىسى.
سونىمەن قاتار ول بىرنەشە جىلدان بەرى سالاداعى تاريف ماسەلەسى ايتىلىپ كەلە جاتقانىن ەسكە سالدى. 2020 جىلدان باستاپ كرەديتورلىق قارىز دەگەن ماسەلە پايدا بولدى. بۇل تۇرعىدا مەديسينالىق مەكەمەلەر كرەديتورلىق قارىزدى كوبەيتىپ الدى. وسىنىڭ سالدارىنان بۇل بەرەشەك جىلدان-جىلعا كوشىپ جاتادى.
– نەگىزگى سەبەبى – ول تاريفتەردىڭ تومەندىگى. ياعني، تاريفتەر ناقتى مەديسينالىق قىزمەتكە جۇمسالىپ جاتقان قاراجاتتى وتەمەۋى سالدارىنان وسىنداي قارىزدار ءوسىپ جاتىر. جوعارىدا ايتقانداي، بولىنگەن قارجىنى ءتيىمسىز يگەرۋ ماسەلەسى بار. سوندىقتان وسى ەكى باعىتتا 2024 جىلى دەنساۋلىق ساقتاۋ مينيسترلىگى ءوزىنىڭ جۇمىسىن ۇيىمداستىردى. 10 جىلدان بەرى تاريفتەر كوتەرىلمەگەن. انا مەن بالاعا مەديسينالىق قىزمەتتەردىڭ تاريفتەرىن كوبەيتۋگە العاشقى قادام جاسادىق. جارتى جىلدىڭ ىشىندە باستاپقى ناتيجەلەرىن كورىپ وتىرمىز. اتاپ ايتقاندا، قارجىلىق جاعدايمەن قاتار، مەديسينالىق قىزمەتتىڭ ساپاسى جاقسارعانى بايقالدى. پەرزەنتحانالاردا نارەستەلەردىڭ شەتىنەۋى ازايعانى تىركەلدى. سوندىقتان بيىل بۇل باعىتتاعى ناتيجەلەر تاعى جاقسارا تۇسەدى دەپ ۇمىتتەنىپ وتىرمىز، - دەدى مينيستر.
اقمارال ءالنازاروۆانىڭ سوزىنە قاراعاندا، بىلتىر انا ءولىم-جىتىمى ورتاشا ەسەپپەن 13 پايىزعا تومەندەگەن. بۇعان سالاداعى باقىلاۋدىڭ كۇشەيتىلۋى، اۋرۋحانالارداعى ەم-دوم حاتتاماسىن جەتىلدىرۋ قادامدارى، تاريفتەردىڭ ءوسۋى، كادرلاردىڭ ءبىلىمىن شىڭداۋ جۇمىستارى، مەديسينالىق ۇيىمداردىڭ ماتەريالدىق-تەحنيكالىق جابدىقتالۋىن كوتەرۋ ىقپال ەتتى.
مينيستر مىندەتتى الەۋمەتتىك مەديسينالىق ساقتاندىرۋ جۇيەسى ءقازىر الەمدە ءوزىنىڭ قاجەت ەكەنىن دالەلدەگەن تەتىكتەردىڭ ءبىرى ەكەنىن اتاپ ءوتتى.
- دامىعان ەلدەردە ءمامس جۇيەسى بار. ءبىز 2020 جىلى عانا ەنگىزدىك. سوندىقتان بۇل جۇيە ەنگىزىلگەن كەزەڭدە، وعان كوروناۆيرۋس پاندەمياسى پروبلەماسى قوسىلدى. پاندەميا كەزىندە ءتيىستى قاراجاتتىڭ قاجەت بولۋىنا بايلانىستى زاڭدارعا بىرنەشە وزگەرىس ەنگىزىلدى. جالپى، ءمامس جۇيەسىن ساقتاپ قالۋىمىز كەرەك. ءبىراق ونى جەتىلدىرە تۇسەمىز، - دەدى ۆەدومستۆو باسشىسى.