قازاق ۇلتتىق ونەر اكادەمياسىنا جاڭا رەكتور تاعايىندالدى

بۇل قىزمەتكە ازامات ساتىبالدى كەلدى.

تانىمال اكتەر ازامات ساتىبالدى ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى بولىپ تاعايىندالدى، دەپ حابارلادى Almaty-akshamy.kz.

 بۇل تۋرالى ۇلتتىق مۋزەي ديرەكتورى ارىستانبەك مۇحامەدي ۇلى Facebook-تەگى پاراقشاسىندا حابارلاپ، جاڭا باسشىنى قىزمەتىمەن قۇتتىقتادى.

«قۇرمەتتى دوستار، تانىمال كينو جانە تەاتر اكتەرى، تەلەجۇرگىزۋشى، قازاقستاننىڭ ەڭبەك سىڭىرگەن قايراتكەرى ازامات ساتىبالدىنى ت.ق.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى بولىپ تاعايىندالۋىمەن شىن جۇرەكتەن قۇتتىقتايمىن! ونەر ادامىنىڭ تاعدىرى ەرەكشە! قالىڭ كورەرمەن قاۋىم ازاماتتى تەاتر جانە كينو ونەرىنىڭ دامۋىنا ولشەۋسىز ۇلەس قوسىپ جۇرگەن دارىنى ەرەكشە ونەر يەسى رەتىندە تانيدى. ستيۆەن كينگتىڭ «تابىستى ادام مەن تالانتتى ادامنىڭ جالعىز ايىرماشىلىعى – ەرىنبەي ەڭبەك ەتۋىندە» دەگەن كەرەمەت ءسوزى بار. بىلىگى مەن ءبىلىمىن، ىسكەرلىگى مەن جىگەرىن ورايلى ۇشتاستىرا بىلگەن ازاماتتىڭ قازاق ونەرىنىڭ بولاشاقتاعى بەت-بەينەسىن قالىپتاستىراتىن ناعىز كاسىبي ماماندار دايىنداۋ باعىتىندا بارلىق قارىم-قابىلەتىن جۇمسايتىنىنا سەنىمىم مول. ازامات ساتىبالدىۇلىن جاۋاپتى قىزمەتكە تاعايىندالۋىمەن قۇتتىقتاي وتىرىپ، الداعى قىزمەتىنە ساتتىلىك جانە تابىس تىلەيمىن!» – دەدى ارىستانبەك مۇحامەدي ۇلى.

ايتا كەتسەك، ازامات ساتىبالدى 1977 جىلى 2 قاراشادا جامبىل وبلىسىنىڭ تۇرار رىسقۇلوۆ اۋدانىندا تۋعان. قازاقستاننىڭ ەڭبەك سىڭىرگەن قايراتكەرى (2014). قازاقستان جاستار وداعى سىيلىعىنىڭ يەگەرى (2002). مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ اكتەرى.