بيىل سىيلىق الۋعا 300-گە جۋىق ءوتىنىم كەلىپ تۇسكەن
پرەزيدەنت تەلەراديوكەشەنى قۇرامىنداعى «Qazaq TV» تەلەارناسى «تۇمار» ۇلتتىق تەليەۆيزيالىق جۇلدەسىن جەڭىپ الدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«Qazaq TV» تەلەارناسى ازىرلەگەن تۇرمىستىق قورلىق-زومبىلىققا قارسى «جەنا» جوباسى «ۇزدىك رەجيسسەرلىك جۇمىس» نوميناسياسىندا جەڭىمپاز اتاندى. ونى تانىمال رەجيسسەر قانات بەيسەكەيەۆ تۇسىرگەن.
«قانات، بۇل سەنىڭ سىيلىعىڭ. ول ءقازىر تۇسىرىلىمدە ءجۇر، سوندىقتان بۇگىن كەلە المادى. ءبىراق ول بارشاڭىزعا سالەم جولدادى جانە كاسىبي مەرەكەمەن قۇتتىقتادى. ارىپتەستەرىمدى قۇتتىقتاعىم كەلەدى جانە جۇمىستارىڭىزدان ءلاززات الۋدى تىلەيمىن. ءقازىر وسى ساحنادا جاس قىزىممەن بىرگە قوعامىمىزدا تۇرمىستىق زورلىق-زومبىلىقتىڭ جويىلۋىن تىلەگىمىز كەلەدى»، - دەدى «Qazaq TV» تەلەارناسىنىڭ ديرەكتورى ماييا بەكبايەۆا.
ايتا كەتەيىك، ەلوردادا «تۇمار-2022» ۇلتتىق تەليەۆيزيالىق سىيلىعىنىڭ جەڭىمپازدارى ماراپاتتالدى. تەليەۆيزيالىق شەبەرلىك ءۇشىن بەرىلەتىن «تۇمار-2022» ۇلتتىق سىيلىعىندا 10 نوميناسيا بار. بيىل سىيلىق الۋعا 300-گە جۋىق ءوتىنىم كەلىپ تۇسكەن، ەڭ كوپ ءوتىنىم «ۇزدىك دەرەكتى فيلم»، «ۇزدىك اقپاراتتىق باعدارلاما»، «ۇزدىك الەۋمەتتىك جوبا»، «ۇزدىك تەلەجۋرناليست»، «ۇزدىك تەلەجۇرگىزۋشى» نوميناسيالارى بويىنشا قابىلدانعان.
«تۇمار» جۇلدەسىن ماراپاتتاۋ كەشىندە «بالالار جىلىنا» ەرەكشە ءمان بەرىلدى. كەشتى بالالار جۇرگىزدى جانە بارلىق جەڭىمپازدار بالالارمەن بىرگە ساحناعا شىقتى.
«تۇمار» ۇلتتىق تەليەۆيزيالىق بايگەسى 2017 جىلى قازاقستان رەسپۋبليكاسى اقپارات جانە قوعامدىق دامۋ مينيسترلىگىنىڭ باستاماسىمەن قۇرىلعان. سىيلىق جەڭىمپازدارى قازاقستاندىق تەليەۆيزيانى دامىتۋعا قوسقان ۇلەسى ءۇشىن «تۇمار» مۇسىنشەسى مەن 1 ميلليون تەڭگە كولەمىندە اقشالاي سىياقى الادى.