قازاق تىلىندە وقيتىن وقۋشىلاردىڭ ءبىلىم ساپاسى ارتىپ كەلەدى

قالا مەن اۋىل وقۋشىلارى اراسىندا وقۋ ساۋاتتىلىعىنداعى الشاقتىق 22 بالعا قىسقارعان. 

قازاق جانە ورىس تىلىندە وقيتىن ءبىلىم الۋشىلاردىڭ اراسىنداعى الشاقتىق 21 بالعا قىسقاردى. بۇل تۋرالى «اقپاراتتىق-ساراپتامالىق ورتالىق» اق باسقارما ءتوراعاسى ماعجان امانعازى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

 «قالا مەن اۋىل وقۋشىلارى اراسىندا وقۋ ساۋاتتىلىعىنداعى الشاقتىق 22 بالعا قىسقارعان. 2018 جىل بۇل كورسەتكىش 37 بالدى قۇراسا، 2021 جىلدىڭ زەرتەۋ ناتيجەسىنە سايكەس 15 بالل بولدى. بۇل الشاقتىق نەگىزىنەن اۋىل مەكتەپتەرىنىڭ وڭ ديناميكاسى نەگىزىندە ورىن الدى. وقىتۋ ءتىلى بويىنشا، ياعني، قازاق جانە ورىس تىلىندە وقيتىن ءبىلىم الۋشىلاردىڭ اراسىنداعى الشاقتىق 21 بالعا قىسقاردى. بۇل جەردە دە الشاقتىق قازاق تىلىندە وقيتىن وقۋشىلاردىڭ اناعۇرلىم وڭ ديناميكاسى ناتيجەسىندە قىسقاردى»، - دەدى ماعجان امانعازى وقۋ-اعارتۋ مينيسترلىگىنىڭ اپپارات جينالىسىندا. 

بۇعان دەيىن ول 2021 جىلى جۇرگىزىلگەن PISA حالىقارالىق زەرتتەۋىنىڭ العاشقى ناتيجەلەرىن جاريالاعان ەدى. 

 «PISA-2018-بەن سالىستىرعاندا، بارلىق ءۇش باعىت بويىنشا وڭ ديناميكانى بايقاپ وتىرمىز. سونىمەن قاتار فۋنكسيونالدىق ساۋاتتىلىعى تومەن ءبىلىم الۋشىلاردىڭ دا ۇلەسى قىسقارىپ وتىر. قالا مەن اۋىل وقۋشىلارى اراسىنداعى وقۋ ءتىلى تۇرعىسىنان الشاقتىقتىڭ قىسقارعانىن اتاپ وتكەن ءجون»، - دەدى ول.