الماتىداعى رەسپۋبليكالىق دوستىق ۇيىندە «قازاق ءتىلى» كلۋبى بار.
اتالعان كلۋب 2021 جىلدىڭ قازانىنان بەرى جۇمىس ىستەپ كەلەدى، دەپ حابارلايدى Almaty-akshamy.kz.
«قازاق ءتىلى» كلۋبىنا قاتىسۋشىلارعا وكسانا نابييەۆا ەسىمدى جاس مامان ساباق بەرەدى. قازاق ءتىلىن جەتىك مەڭگەرگەن وكسانانىڭ جاسى 26-دا. جاس تا بولسا، ول 108 ساباقتان تۇراتىن ءوزىنىڭ جەكە اۆتورلىق ادىستەمەسىن جاساپ ۇلگەرگەن. بۇگىندە سول باعدارلاماسىنىڭ نەگىزىندە وزگەلەرگە ساباق بەرىپ جۇرگەن جايى بار. ادىستەمە اۆتورى اۆتورلىق ادىستەمەسىندە ەتنوس وكىلدەرى مەن بارشا قازاق ءتىلىن ۇيرەنەمىن دەۋشىلەرگە كۇندەلىكتى قولدانىستاعى قاراپايىم ءتىلدى ۇيرەتۋدى كوزگەيدى. قازىرگى تاڭدا ونىڭ الدىنان 241 ادام وفلاين جانە ونلاين فورماتتا قازاق ءتىلىن ۇيرەنىپ ءجۇر.
ءتىل جاناشىرى وكسانانىڭ ايتۋىنشا، بۇگىندە قازاقشاسىن جەتىلدىرىپ، ونى ۇيرەنەمىن دەۋشىلەر تاراپىنان قىزىعۋشىلىق ارتىپ كەلەدى. ءتىل ۇيرەنۋگە تالپىنىستا وڭ ديناميكا بار. ءبىر جىلدان بەرى وسى ءىستى قولعا العان وكسانانىڭ نەگىزگى ماماندىعى - قازاق تىلىنەن ورىس تىلىنە جانە كەرىسىنشە ورىس تىلىنەن قازاق تىلىنە ىلەسپە اۋدارماشى. مەكتەپ جاسىنان باستاپ، قازاق تىلىنە دەن قويعان جاس مامان «قازاقشانى ۇيرەنۋگە قۇلقى جوقتارعا» نيەت بولسا، ءبارى مۇمكىن ەكەنىن ايتادى.
«ءتىلدى مەڭگەرەمىن، ۇيرەنەمىن دەگەن ادام كەز كەلگەن جەردەن مۇمكىندىك تاۋىپ، وقۋعا بولادى. اقپارات از، كۋرس جوق، كىتاپ جوق دەگەن سوزدەردىڭ ءبارى – جاي عانا سىلتاۋ. سەبەبى قازىرگى 21-عاسىردا مۇمكىندىكتەر وتە كوپ. سول سەبەپتى تەك وقۋ كەرەك»، - دەيدى وكسانا نابييەۆا.
وكسانانىڭ ايتۋىنشا، ءقازىر قازاق ءتىلى قاجەتتىلىكتەن بۇرىن، سانگە اينالعان. وسىنى ەسكەرگەن ول الەۋمەتتىك جەلىدەگى پاراقشاسىندا دا اۆتورلىق كونتەنتكە ءمان بەرگەن. ياعني وندا ول قازاق تىلىندەگى حيت اندەردىڭ ماعىناسىن ءتۇسىندىرىپ، كۇندەلىكتى ومىردەگى جايتتارعا سوزدىك قولدانىستاردى قازىرگى زاماننىڭ سۇرانىسىنا ساي قىسقا دا نۇسقا ەتىپ، وقىرماندارىنا ۇسىنىپ ءجۇر.
وكسانا نابييەۆانىڭ ايتۋىنشا، كۋرستى بىتىرگەندەر ا-2 دەڭگەيىن مەڭگەرىپ شىعادى. ياعني كۇندەلىكتى ومىرگە قاجەتتى تىلدىك نورمالاردى ۇيرەنىپ، ەركىن سويلەي الادى. وتكەن جىلى كۋرستى 748 ادام وقىپ شىققان.