1958 جىلى 8 ناۋرىزدا قازاق ارناسىنىڭ شاڭىراق كوتەرۋى ەل تاريحىنداعى ەلەڭ ەتكىزەر جاڭالىق بولدى
ق ر مەملەكەتتىك ورتالىق مۋزەيىندە «قازاق تەليەۆيزياسىنىڭ 65 جىلدىعى: تاسپاداعى تاريح» اتتى مادەني ءىس-شارا ءوتتى، دەپ حابارلايدى Almaty-akshamy.kz.
1958 جىلى 8 ناۋرىزدا قازاق ارناسىنىڭ شاڭىراق كوتەرۋى ەل تاريحىنداعى ەلەڭ ەتكىزەر جاڭالىق بولدى. سول ساتتەن بۇگىنگە دەيىن ۇلتتىق قۇندىلىقتار مەن مۇراتتاردى ناسيحاتتاۋدا ىقپالدى كۇشكە اينالدى.
تاريحي دەرەكتەرگە سۇيەنسەك، تۇڭعىش قازاق تەلەارناسىنىڭ تىرناقالدى حابارىن رەسپۋبليكا كورەرمەندەرى 4100 تەلەديداردان تامشالاعان. جەلتوقسان ايىنان كۇندەلىكتى 5 ساعاتتىق حابار بەرىلە باستادى. 1970-جىلدارى تەلەبايقاۋلار دۇنيەگە كەلىپ، 1980-جىلدارى توك-شوۋلارمەن تولىققان. وسى جىلدار ىشىندە تەلەارنا سان ءتۇرلى وزگەرىستەردى باستان كەشىردى. العاشقى كاسسەتالى اۋىر كامەرالار مەن سىمى بار ميكروفونداردىڭ ورنىنا سان قىرلى تەحنيكالىق مۇمكىندىگى بار سيفرلىق تەليەۆيزيا كەلدى. بىرتىندەپ وبلىستىق تەلەستۋديالار دا ءوز جۇمىستارىن باستاپ، جەرگىلىكتى حالىقتى ساپالى اقپاراتپەن قامتاماسىز ەتكەن. ەل ومىرىندە قانداي ەلەۋلى وقيعا بولسا، تەليەۆيزيا سونىڭ بەل ورتاسىندا ءجۇردى. كوك ساندىق قازاق كورەرمەنىن وركەنيەتكە ىلەستىرە وتىرىپ، كومبەدە قالعان دۇنيەسىمەن قايتا قاۋىشتىردى. ۇلتتىق ارنا 2011 جىلدىڭ قىركۇيەك ايىنان بەرى 100 پايىز قازاق تىلىندە حابار تاراتا باستادى.
شارادا «Qazaqstan» تەلەراديوكورپوراسياسى الماتى فيليالىنىڭ ديرەكتورى جيرەنشينا ساۋلە جانىبەك قىزى، قازاق تەليەۆيزياسىنىڭ ارداگەرلەرى - ديكتور، ق ر ەڭبەك سىڭىرگەن ءارتىسى سەيىتوۆ لاسكەر قالي ۇلى، جۋرناليست قايمولدينوۆ تولەۋباي سماعۇل ۇلى، ديكتور بەگەمبايەۆا فاتيما مامىربەك قىزى قاتىستى. ولار تەليەۆيزيانىڭ مادەنيەت پەن ونەردى دامىتۋعا، ۇلتتىڭ سانانىڭ ويانىپ، ءورىسىنىڭ كەڭەيۋىنە وراسان ۇلەسى، ۇلتتىق ارناداعى قىزىعى مەن قيىندىعى قاتار جۇرگەن ۇمىتىلماس ساتتەرىمەن ءبولىستى.
ق ر مەملەكەتتىك ورتالىق مۋزەيى ديرەكتورىنىڭ ورىنباسارى دانيار بايجۇمانوۆ ەلىمىزدىڭ ۇلتتىق مۇراسىن ناسيحاتتاۋدا زور ەڭبەك سىڭىرگەن ارداگەرلەرگە العىس حاتتار تابىستادى. قۇتتىقتاۋ سوزىندە «تامىرى تەرەڭگە جايىلعان ۇلتتىق ارنانىڭ تاريحى، ول - ەلدىڭ تاسپاداعى تاريحى. بۇگىندە وسى سالانىڭ جەتكەن جەتىستىگى، العان اسۋى الدىڭعى تولقىنداعى زەردەلى، ويشىل، كاسىبي مامانداردىڭ ەڭبەگىنىڭ جەمىسى»، - دەدى ول.
شارا سوڭىندا قوناقتار «قازاق تەليەۆيزياسىنىڭ 65 جىلدىعى: تاسپاداعى تاريح» تاقىرىبىنداعى كورمەنى تاماشالادى. كورمەگە مۋزەي قورىنان 30-دان اسا زاتتار قويىلدى. اتاپ ايتقاندا، جازۋ ماشينالارىنىڭ، تەلەفون جانە تەلەگراف، تەلە،-راديوقابىلداعىش قۇرىلعىلارىنىڭ العاشقى ۇلگىلەرى، سونىمەن بىرگە بۇگىندە كۇندەلىكتى قولدانىستان شىعا قويماعان ۇلگىلەرى كورسەتىلدى.
مادەني ءىس-شاراعا ارنايى مۋزىكالىق باعدارلامامەن كەلگەن قازاق ۇلتتىق قىزدار پەداگوگيكا ۋنيۆەرسيتەتىنىڭ «ۇلار» ەتنوفولكلورلىق ءانسامبلى، «توميريس» بي ءانسامبلى مەن «اسۋ» شوۋ-بالەت توبى ءوز ونەرلەرىن كورسەتتى.