Qazaq Stroy كومپانياسى اتا-اناسىنان ايىرىلعان ءتورت بالاعا ءۇش بولمەلى پاتەر سىيلادى. بۇل تۋرالى Aqshamnews.kz سايتى حابارلايدى.
بالالاردىڭ اكەسى ەركەبۇلان سىدىقبايەۆ 2022 جىلعى قاڭتار وقيعاسى كەزىندە قازا تاپسا، اناسى سايا ەسەنگەلدى جول-كولىك اپاتىنان مەرت بولعان.
"Qazaq Stroy ۇجىمى اتا-اناسىز قالعان ءتورت بالانىڭ تاعدىرىنا بەي-جاي قاراي المادى. سايا ەسەنگەلدى بالالارى ءۇشىن ءومىرىنىڭ سوڭىنا دەيىن كۇرەستى، بۇل ءبىزدى تەرەڭ تەبىرەنتتى. بىر-بىرىمىزگە قولداۋ كورسەتۋ – ءبىزدى مىقتى ۇلت ەتەتىن قاسيەت. سوندىقتان بۇل بالالاردىڭ باسپاناسىز قالۋىنا جول بەرە المادىق"، – دەدى كومپانيا وكىلدەرى.
كومپانيانىڭ نەگىزىن قالاۋشى نۇرلان ارتىقبايەۆ بالالار كامەلەتتىك جاسقا تولعانشا ولارعا اي سايىن 100 000 تەڭگەدەن جاردەماقى تولەپ وتىرۋدى شەشتى.
"ءبىز بالالاردىڭ قايعىسىن جەڭىلدەتە المايمىز، ءبىراق ولاردىڭ بولاشاعى ءۇشىن قول ۇشىن سوزا الامىز. قازاقتىڭ كۇشى – بىرلىگىندە، بىر-بىرىنە دەمەۋ بولۋىندا. بۇل ءۇي بالالار ءۇشىن ءۇمىت پەن جىلىلىق مەكەنى بولادى دەپ سەنەمىز"، – دەدى نۇرلان ارتىقبايەۆ.
Qazaq Stroy كومپانياسى بالالارعا پاتەردىڭ كىلتى مەن مەنشىك سەرتيفيكاتىن تابىستادى.
"قايعىنى سوزبەن ولشەۋ مۇمكىن ەمەس، اتا-انانىڭ ورنى تولمايدى. ءبىراق ءبىز جاناشىرلىق پەن مەيىرىمنىڭ الەمدى جارىق ەتە الاتىنىنا سەنەمىز. سايا ەسەنگەلدىنىڭ تۋعان-تۋىستارىنا كوڭىل ايتامىز. بالالارىنا بولاشاقتا جىلۋلىق پەن قامقورلىق جەتىسپەسىن دەپ تىلەيمىز"، – دەپ مالىمدەدى كومپانيا.
كىلت سوزدەر: Qazaq Stroy، قايىرىمدىلىق، جەتىم بالالار، باسپانا سىيلاۋ، نۇرلان ارتىقبايەۆ، قاڭتار وقيعاسى.