تۇركيانىڭ ىستامبۇل قالاسىندا ءداستۇرلى ۇمرانيە كىتاپ كورمەسى ءوتتى.
"قايىرشىنىڭ ميللياردەر دوسى" اتتى حيكايات تۇركيادا ۇلكەن سۇرانىسقا يە بولىپ، جازۋشىعا ارنايى شاقىرتۋ جىبەرىلگەن. 100-گە جۋىق قازاق جازۋشىسىنىڭ ەڭبەكتەرىن تۇرىك تىلىنە اۋدارعان اشۋر وزدەمىر كىتاپتىڭ جەڭىل اۋدارىلعانىن، قوعامداعى وزەكتىلىگىن تىلگە تيەك ەتتى. حيكاياتتىڭ ءتىلىنىڭ جاتىقتىعى سونشا ءوز وقىرمانىن تاۋىپ ۇلگەرگەنىن ايتادى. اششى ساركازممەن، ۋىتتى تىلمەن ورنەكتەلگەن پوۆەسكە سۇرانىس جوعارى. باسا ايتا كەتەر ءبىر جايت، بۇعان دەيىن شىعارمالارى التى تىلگە اۋدارىلعان قاناعات ءابىلقايىردىڭ "قايىرشىنىڭ ميللياردەر دوسى" اتتى حيكاياتى تاياۋدا اعىلشىن تىلىندە جارىق كورەدى دەپ كۇتىلۋدە. مىڭ دانامەن شىققان كىتاپتىڭ تۇساۋى وسىدان ءۇش جىل بۇرىن كەسىلگەن. ءتۇرلى جانر توعىسقان تۋىندىنى پاراقتاي وتىرىپ، قازىرگى كۇننىڭ شىنايى كەلبەتىن كورە الاسىز. حيكاياتتا قاعاناعى قارق قالتالى بايلاردىڭ، اسىرە استامشىلىعى مەن قاراپايىم حالىقتىڭ دارمەنسىزدىگى ءسوز بولادى، دەپ جازدى كتك.
"ارنايى شاقىرعان سەبەبى، بىلتىر اشۋر وزدەمىر دەگەن اعامىز مەنىڭ «ميللياردەردىڭ قايىرشى دوسى» دەگەن كىتابىمدى تۇرىك تىلىنە اۋدارعان. باسىلىپ شىققاننان كەيىن سۇرانىس جاقسى بولىپتى. كىتاپ جاقسى ءوتىپتى. ناسيحاتى جاقسى بولىپتى. بىزدەگى سياقتى جاي عانا كىتاپ دۇكەندەرى عانا ەمەس، ولاردا كىتاپتاردى سايتتاردا، بىزدەگى ينتەرنەتتە ساتقان سياقتى ساتادى ەكەن. سول ارقىلى تۋىندى جاقسى ءوتىپ جاتىر، ءسىزدى كىتاپ كورمەسىنە شاقىرامىز دەپ حابارلاستى"، -دەدى جازۋشى قاناعات ءابىلقايىر