قازاق رۋلارىن جاتقا بىلەتىن شەتەلدىك

حەيميش پولس اتىراۋدا 2017 جىلدان بەرى تۇرادى.

ول بوس ۋاقىتىندا قازاق حالقىنىڭ رۋلارىن زەرتتەيدى ەكەن، دەپ حابارلايدى Almaty-akshamy.kz AtyrauPress-كە سىلتەمە جاساپ.

شەتەلدىك حەيميش پولس قازاقتىڭ رۋلارىن، ەتنيكالىق قۇرامى مەن حالىقتىڭ باسقا دا ەرەكشەلىكتەرىن جاقسى بىلەتىن بولىپ شىقتى. كىشى ءجۇزدىڭ بارلىق رۋىن، ونىڭ ىشىندە 4 تايپا مەن 31 رۋ بارىن دا ايتىپ وتىر.

جەرگىلىكتى جەردەگى بىرلەسكەن كومپانيانىڭ بىرىندە قىزمەت ەتەتىن حەيميش پولس اتىراۋدا 2017 جىلدان بەرى تۇرادى. وسى ۋاقىت ىشىندە قازاق حالقىنىڭ ءسالت-داستۇرى مەن مادەنيەتى جايلى كوپ ماعلۇمات العان. بوس ۋاقىتىندا قازاق حالقىنىڭ رۋلارىن زەرتتەيدى ەكەن. ونىڭ ايتۋىنشا، https://news.google.com/بۇل اقپارات ارقىلى وزىنە جاڭالىقتار اشىپتى.

«مەن ءبىر حالىقتىڭ رۋلارعا قالاي بولىنەتىنىن بىلگىم كەلدى. قازاقستاندا 200-دەن استام رۋ بار. ءقازىر مەن كىشى ءجۇزدىڭ رۋلارىن عانا جاتقا بىلەمىن. جىل سايىن ارىپتەستەرىممەن بىرگە مەن دە كوكتەمنىڭ كەلگەنىن اتاپ ءوتۋدى ۇناتامىن. ال، قازاق مادەنيەتىنە توقتالساق، مەنى ولاردىڭ رۋلارى قاتتى قىزىقتىرادى. ۋاقىت تابىلا قالسا، ءبارىن ۇيرەنۋگە اسىعامىن»، - دەيدى ول.

قازاق حالقىنىڭ ءوز ۇلتتىق كيىمدەرىن كيىپ جۇرگەنى ونى ەرەكشە قۋانتادى ەكەن. ول قازاق كيىمدەرىنىڭ اسەمدىگىن ەرەكشە اتاپ ءوتتى. ويۋ-ورنەكتەر كوكتەمنىڭ كەلۋىن بەينەلەيتىندەي.

«باۋىرساق پەن ناۋرىز كوجەنىڭ ءدامىن تاتىپ كوردىم. قاتتى ۇنادى. ءوزىمنىڭ ۇلتتىق كيىمىم بار. ونى ارنايى مەرەكەلەرگە كيىپ جۇرەمىن. ويۋ-ورنەكتەرى مەن تۇستەرى كوڭىل-كۇيىمدى كوتەرەدى. باسقالاردان مۇلدەم ەرەكشە. مۇندا ادامدار وتە مەيىرىمدى، قوناقجاي. بۇل جەردىڭ تابيعاتى دا بولەك»، - دەيدى حەيميش پولس.

بۇدان بولەك، قازاقتىڭ ۇلتتىق ويىندارى مەن مۋزىكالىق اسپاپتارىن دا ۇناتادى. ول جاقىندا اسىق پەن لاڭگى ويناۋدى ۇيرەنىپتى. ونىڭ پايىمداۋىنشا، اسىق دالدىكتى، ۇستامدىلىقتى، تاپقىرلىقتى دامىتىپ، دۇرىس ەسەپتەۋدى ۇيرەتەدى. ال، لاڭگى ەپتىلىكتى جەتىلدىرەدى.

«ۇلتتىق ويىنداردى ماعان كەنجە ۇلىم ۇيرەتتى. ول اتىراۋدا وقىپ ءجۇرىپ ۇيرەنىپ العان. سونداي-اق، 15 جاستاعى ۇلىم دومبىرا تارتا الادى. ءقازىر التى كۇيدى ەركىن ورىندايدى. ءبىزدىڭ سۇيىكتى كۇيلەرىمىز – «اداي» مەن «بالبىراۋىن». مەنىڭ تۇسىنگەنىمدەي، بۇل – اتىراۋداعى ەڭ تانىمال شىعارمالار»، - دەيدى ح.پولس.