بوستاندىق اۋدانىنداعى ءورت ءسوندىرۋ دەپوسى «قازاقفيلم»، «كوكشوقى»، «الاتاۋ»، «نۇر-الاتاۋ» «ەرمەنساي» سىندى بەس شاعىن اۋدانعا ەسەپتەلگەن. الماتى قالاسى اكىمدىگىنىڭ باقىلاۋىمەن جۇرگىزىلىپ جاتقان قۇرىلىس-مونتاج جۇمىستارى بيىل قاراشا ايىندا اياقتالادى، دەپ حابارلايدى almaty-akshamy.kz
دەپو تاۋلىك بويى 4 اۋىسىمدا جۇمىس ىستەيدى، ءار اۋىسىمدا 23 ادام. ىسكە قوسىلعاننان كەيىن قۇتقارۋشىلاردىڭ ءورت ورنىنا كەلۋ ۋاقىتى قىسقارادى. جوباعا سايكەس، ءۇش قاباتتى عيماراتتىڭ اۋدانى 3،7 شارشى مەتردەن استى.
دەپونىڭ ءبىرىنشى قاباتىندا اۋىسىم باسشىسىنىڭ كابينەتى، كەزەكشى اۋىسىمنىڭ ەكى دەمالىس بولمەسى (ءارقايسىسى 14 ادام)، اپپاراتتىق، ديسپەچەرلىك بولمە، گازتۇتقىشتاردى، جەڭدەردى ساقتاۋعا جانە تەكسەرۋگە، ارنايى كيىمدى جۋۋعا جانە كەپتىرۋگە ارنالعان تەحنيكالىق بولمەلەر، شەبەرحانا، قۇرالدار مەن قوسالقى بولشەكتەر قويماسى، رەزەرۆتىك اۆتوموبيلدەردىڭ گاراج-تۇراعى، اۆتوكولىك جۋۋ جانە ت.ب. ورنالاسادى.
ەكىنشى قاباتتا سپورت زالى، دۋش جانە جۋىناتىن بولمە، كيىم-كەشەك بولمەسى، قويما، كومەندانت بولمەسى، تاماقتانۋ بولمەسى، جۋىناتىن جانە جيناۋعا ارنالعان جابدىقتار قوياتىن بولمە بار.
ءۇشىنشى قاباتتا نۇسقاۋشىلارعا ارنالعان كابينەتتەر، حولل، 56 ادامعا ارنالعان زال، 28 ادامعا ارنالعان جەدەل-تاكتيكالىق شەبەرلىك سىنىبى، پسيحولوگيالىق كەڭەس بەرۋ بولمەسى، قابىلداۋ بولمەسى، حالىققا نۇسقاۋ بەرۋ بولمەسى، قىزمەتتىك كابينەتتەر جانە ت.ب. ورنالاسقان.
دەپودا 4 اۆتوموبيلگە ارنالعان تۇراق، سونىمەن قاتار، 2 كولىك قۇرالىنا ارنالعان رەزەرۆتىك تۇراق ۇيىمداستىرىلعان. اۆتوكولىككە تەحنيكالىق قىزمەت كورسەتۋدىڭ ارنايى بەكەت بار.
بۇعان دەيىن 2023 جىلدىڭ مامىر ايىندا جۇمىس ساپارى كەزىندە الماتى اكىمى ەربولات دوسايەۆ اتالعان نىساندى ارالاپ، وسى جىلدىڭ جەلتوقسان ايىندا پايدالانۋعا بەرۋدى تاپسىرعان بولاتىن.
قازىرگى ۋاقىتتا «BI Group» ج ش س مەردىگەرى ىشكى ارلەۋ، سونىمەن بىرگە ىرگەلەس اۋماقتى اباتتاندىرۋ بويىنشا جۇمىستاردى قولعا العان.
الماتىدا بارلىعى 19 ءورت ءسوندىرۋ بولىمشەسى بار، ءقازىر تاعى 3 جاڭا دەپونى جوبالاۋ جۇمىستارى جۇرگىزىلىپ جاتىر.