بيىل قازاقستاننىڭ مادەنيەت جانە ونەر سالاسىنا ەرەكشە ۇلەس قوسقان ساۋىق ءماسىعۇت قىزى جاقانوۆا 80 جاس مەرەيتويىن اتاپ وتەدى. وسىعان وراي، 2025 جىلعى 15 اقپان كۇنى ساعات 14:00-دە قازاقستان رەسپۋبليكاسىنىڭ ۇلتتىق كىتاپحاناسىندا ونىڭ قۇرمەتىنە ارنالعان «ساحارا ساندۋعاشى» اتتى كىتاپتىڭ تانىستىرىلىمى وتەدى، دەپ حابارلايدى aqshamnews.kz
ساۋىق جاقانوۆا 1945 جىلى 11 اقپاندا قاراعاندى وبلىسى، شەت اۋدانى، ەركىندىك اۋىلىندا دۇنيەگە كەلگەن. ول س.م. كيروۆ اتىنداعى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن 1966 جىلى بىتىرگەن. سول جىلى ەڭبەك جولىن قازاق راديوسىنىڭ ديكتورى رەتىندە باستاپ، وندا 2002 جىلعا دەيىن ۇزدىكسىز قىزمەت ەتتى.
كاسىبي مانسابىندا ساۋىق ءماسىعۇت قىزى ءوزىنىڭ ەرەكشە داۋىسىمەن حالىق جۇرەگىنە جول تاۋىپ، قازاق راديوسىنىڭ بەتكە ۇستار ديكتورلارىنىڭ بىرىنە اينالدى. ونىڭ شىعارماشىلىعى مەن ەڭبەگى جوعارى باعالانىپ، 1985 جىلى «قۇرمەت بەلگىسى» وردەنىمەن ماراپاتتالدى، ال 1995 جىلى «قازاقستان رەسپۋبليكاسىنىڭ ەڭبەك سىڭىرگەن ءارتىسى» اتاعىنا يە بولدى.
قازاقستان رەسپۋبليكاسى پرەزيدەنتiنiڭ 2021 جىلعى 2 جەلتوقسانداعى جارلىعىمەن "قازاقستاننىڭ ەڭبەك سىڭىرگەن قايراتكەرى" قۇرمەتتى اتاعى بەرىلدi.
«ساحارا ساندۋعاشى» كىتابى – رۋحاني مۇرا
مەرەيتوي قارساڭىندا جارىق كورگەن «ساحارا ساندۋعاشى» كىتابى ساۋىق جاقانوۆانىڭ ءومىرى مەن شىعارماشىلىعىن باياندايدى. بۇل كىتاپتا ونىڭ ءومىر جولى، راديوداعى قىزمەتى، ۇستازدىق ەڭبەگى جانە قازاقستان مادەنيەتىن دامىتۋعا قوسقان ۇلەسى قامتىلعان.
ساۋىق جاقانوۆانىڭ 80 جىلدىق مەرەيتويى – قازاق رۋحانياتى مەن مادەنيەتىنىڭ تاعى ءبىر جارقىن بەتى.
"ساحارا ساندۋعاشى" اتتى كىتاپتىڭ قۇراستىرۋشىلارى - جۋرناليست تاڭسۇلۋ الدابەرگەن قىزى مەن شاكىرتى، راديوجۋرناليست جازيرا امانتاي قىزى.
كiتاپ "اتامۇرا" باسپاسىنان جارىققا شىعادى.