قازاق قىزى «سلاۆيان بازارى» بايقاۋىنان جۇلدە الدى

«سلاۆيان ءحيتى» بايقاۋىندا قۇرالاي بەلارۋس حالقىنىڭ «رەچانكا» ءانىن شىرقاپ، 70 ۇپايدىڭ 69-ىن جيناعان ەدى.

«ۆيتەبسكىدەگى سلاۆيان بازارى» مۋزىكالىق بايقاۋىندا قازاقستاندىق ءانشى قۇرالاي مەيرامبەك ءۇشىنشى ورىندى يەلەندى، دەپ حابارلايدى Almaty-akshamy.kz

ۆelta.by اقپاراتىنا ساي، ەكى كۇندىك بايقاۋ ناتيجەسىندە ارمەنيالىق ونەرپاز ماشا مندجويان باس جۇلدە السا، ءبىرىنشى ورىن – بەلارۋس سامير ەلچييەۆكە بەرىلدى. ەكىنشى ورىندى – رەسەيلىك ەليزاۆەتا سلىشكينا مەن يتاليالىق Agape ءبولىستى. ءۇشىنشى ورىندى – قازاقستاندىق قۇرالاي مەيرامبەك جانە وزبەكستاندىق ماليكا حاكيموۆا يەلەنگەن.

«قۇرمەتتى قازاق ەلىم! بايقاۋدا قولداپ، جانكۇيەر بولعان بارشاڭىزعا مىڭ العىس! اللا قالاسا ءالى تالاي كوك تۋىمدى الەمدە كوكتە جەلبىرەتەتىن بولامىن!»، - دەپ جازدى قۇرالاي ءوزىنىڭ Instagram پاراقشاسىندا.

«سلاۆيان ءحيتى» بايقاۋىندا قۇرالاي بەلارۋس حالقىنىڭ «رەچانكا» ءانىن شىرقاپ، 70 ۇپايدىڭ 69-ىن جيناعان ەدى.

بايقاۋدىڭ ەكىنشى كۇنى «الەمدىك حيت» سايىسىندا ق. مەيرامبەك «Frozen 2» انيماسيالىق فيلمىندەگى «Into the unknown» ساۋندترەگىن ورىنداپ، 63 ۇپاي الدى.