تجم قۇتقارۋشىلارى تاۋداعى ءقاۋىپسىز ءجۇرىس-تۇرىس ەرەجەلەرىن ساقتاۋدى ەسكە سالادى.
تجم رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى الماتى قالاسى مەدەۋ اۋدانىنىڭ تاۋلارىندا بۋكرەيەۆ شىڭىنان بۋتاكوۆ شاتقالىنا قاراي ءتۇسىپ كەلە جاتقان كەزدە جولدان اداسىپ كەتكەن ءۇش ءجاسوسپىرىمدى قۇتقاردى، دەپ حابارلايدى Almaty-akshamy.kz
ق ر تجم باسپا ءسوز قىزمەتىنىڭ حابارلاۋىنشا، ساعات 19.43-تە تۋريستەردى ىزدەۋگە 5 ادامنان تۇراتىن جەدەل قۇتقارۋشىلار توبى، ونىڭ ىشىندە كينولوگيالىق ەسەپتوپ شىقتى. ساعات 21.14-تە قۇتقارۋشىلار جاسوسپىرىمدەردى تاۋىپ، رەسپۋبليكالىق جەدەل-قۇتقارۋ جاساعىنىڭ كولىگىنە قاراي ءتۇسىرۋ جۇمىستارىن باستادى.
"ساعات 23.05-تە توپ بالالارمەن بىرگە ورمان اسۋىنا جەتىپ، تومەن ءتۇسۋدى جالعاستىردى. ساعات 00:19-دا قۇتقارۋشىلار مەن بالالار رەسپۋبليكالىق جەدەل-قۇتقارۋ جاساعىنىڭ كولىگىنە جەتتى. بۋتاكوۆ شاتقالىنداعى شلاگباۋم ماڭىندا ولاردى جاسوسپىرىمدەردىڭ تۋىستارى كۇتىپ الدى"، دەلىنگەن حابارلامادا.
"تۋىستارىڭىزعا نەمەسە جاقىندارىڭىزعا ءارقاشان جوسپارلانعان مارشرۋت تۋرالى ەسكەرتىڭىزدەر، تاۋعا بىر-بىردەن بارماڭىزدار، قاۋىپسىزدىك ءۇشىن جولدى قىسقارتپاڭىزدار، مارشرۋتتىڭ نەگىزگى بولىگىن كۇندىزگى ۋاقىتتا جاساڭىزدار"، دەلىنگەن حابارلامادا.