قازاق قىزىنىڭ اتى اڭىزعا اينالعان "رەال مادريدكە" جۇمىسقا ورنالاسۋى ەرتەگى سياقتى ەستىلۋى مۇمكىن. ءبىراق البينا بۋنەسكۋدىڭ ءومىرى – اڭىز ەمەس، تاباندىلىقتىڭ ناتيجەسى. پاۆلوداردا قاراپايىم مەكتەپتى ءبىتىرىپ، بولاشاعىن قارجى سالاسىندا ەلەستەتكەن كەيىپكەر بۇگىندە الەمدەگى ەڭ ءىرى فۋتبول كلۋبتارىنىڭ بىرىندە – "رەال ءمادريدتىڭ" ستاديون ماركەتينگى بولىمىندە جۇمىس ىستەيدى. اqshamnews.kz ءتىلشىسى "فۋتبول جۇماعىندا" جۇمىس ىستەپ جاتقان كەيىپكەرمەن سۇحباتتاستى.
كيمەپ-تەن كاستيلياعا دەيىن
البينانىڭ ماركەتينگكە دەگەن ماحابباتى العاش كيمەپ ۋنيۆەرسيتەتىنىڭ اۋديتورياسىندا ويانعان. ول بيزنەس-اكىمشىلىك ماماندىعىنا تۇسكەن سوڭ، العاشقى ساباقتا-اق ءوز باعىتىن تاپقانىن ءتۇسىندى. ۋنيۆەرسيتەتتى 2012 جىلى بىتىرگەننەن كەيىن، وسى سالادا 13 جىل جۇمىس ىستەپ كەلەدى. العاشقى بەس جىل – جالدامالى قىزمەتكەر رەتىندە، كەيىن جەكە ماركەتينگ اگەنتتىگىن اشىپ، بيزنەسكە ستراتەگيا ازىرلەۋمەن اينالىسادى.
سپورتقا دەگەن قىزىعۋشىلىعى دا كەزدەيسوق پايدا بولماعان. ەكى رەت Sport Fest Astana كورمەسىن ۇيىمداستىرىپ، سپورت سالاسىنداعى الەۋەتتى بايقاعان البينا ءبىر ساتتە شەشىم قابىلدايدى: ودان ءارى ءبىلىم الىپ، سپورت ماركەتينگكە بەت بۇرۋعا شەشىم قابىلدايدى. بۇل ماقساتتا ول استاناداعى باسپاناسىن ساتىپ، العان اقشانى وقۋىنا قۇيىپ، شەتەلدە ءبىلىم الۋعا بەل بۋادى.
Real Madrid Universidad Europea – فۋتبول ارمانىنىڭ مەكەنى
البينا Real Madrid Universidad Europea ۋنيۆەرسيتەتىنە سپورت ماركەتينگى بويىنشا وقۋعا تۇسەدى. وقۋ بارىسىندا تەك فۋتبول ەمەس، تەننيس، اۆتوسپورت، مارافون سىندى ءتۇرلى سپورت تۇرلەرىنىڭ جوبالارىنا قاتىسادى. "Puma"، Davis Cup، BMW جانە Madrid Marathon سەكىلدى الىپتارمەن جۇمىس ىستەيدى.
"وقۋ جىلى باستالعاندا بىزگە ۇزدىك ءتورت ستۋدەنتكە "رەال مادريد" فۋتبول كلۋبىندا جۇمىس ىستەۋ مۇمكىندىگى بەرىلەتىنى ايتىلدى. شىنىمدى ايتسام، ۇزدىكتەر قاتارىنا كىرۋدى ماقسات ەتپەدىم، تەك وقۋدان ءلاززات الدىم. جىل اياعىندا ۇزدىك ءتورت ستۋدەنتتى اتادى، مەن سولاردىڭ قاتارىندا بولدىم. بۇل مۇمكىندىك ءۇشىن قاتتى قۋاندىم"، - دەيدى ول.
ەشقانداي باسەكە ماقسات ەتپەي، بارىنشا لاززاتپەن وقىعان ول بەرنابەۋ ستاديونىنىڭ ماركەتينگ بولىمىنە تاڭدالادى.
Bernabéu Stadium
ءقازىر البينا – ستاديون ماركەتينگىنىڭ ناقتى قازانىندا قايناپ جۇرگەن مامان. ماچ كۇندەرىنەن بولەك، ستاديوننىڭ ءومىرى تولاسسىز ەكەنىن بىلەدى. كونسەرتتەر، كورمەلەر، كورپوراتيۆتىك شارالار – مۇنىڭ ءبارى قارجى كوزىنە اينالۋعا ءتيىس. البينا وسى ەكوجۇيەنى دامىتۋمەن اينالىسادى. جاقىندا عانا نيۋ-يورككە بارىپ، ءتورت ستاديوندى زەرتتەپ كەلگەن. ەندى العان ءبىلىمىن "رەال ءمادريدتىڭ" پايداسىنا جاراتىپ كەلەدى.
"رەال مادريد" دەگەندە ەڭ الدىمەن ويعا كەلەتىن نارسە – رەسۋرستىڭ اۋقىمى. مۇنداعى جوبا، يدەيا، ادامدار سانى مەن جاھاندىق اۋقىم - كەز كەلگەن ماماننىڭ كاسىبي ارمانى. الايدا مۇنداي برەندتە شەشىم قابىلداۋ دا وڭاي ەمەس – ءار جوبا مۇقيات سارالانىپ، برەندتىڭ قۇندىلىقتارىنا سايكەس كەلۋى تەكسەرىلەدى"، - دەيدى البينا.
كەيىپكەردىڭ ايتۋىنشا، سپورت - ەرلەر باسىم باعىت. ءبىراق تەندەنسيا وزگەرىپ جاتىر: بيىل العاش رەت ول وقيتىن توپتا قىزدار سانى جىگىتتەردەن اسىپ ءتۇستى. دەمەك، ايەلدەر دە سپورتتاعى ماركەتينگكە قىزىعۋشىلىق تانىتىپ جاتىر.
"بولاشاعىمدى قازاقستاندا كورەمىن"
البينانىڭ ۇلكەن ماقساتى – العان ءبىلىم مەن تاجىريبەسىن قازاقستانعا الىپ كەلۋ. بۇگىندە ەلىمىزدە سپورت نىساندارى كوپتەپ سالىنىپ جاتقانىمەن، ونىڭ كوپشىلىگى دۇرىس پايدالانىلمايدى. البينا بۇل جاعدايدى وزگەرتۋگە اتسالىسپاق. سپورت ماركەتينگى سالاسىندا وتاندىق ماماندار از بولعاندىقتان، ول ءوز ۇلەسىن قوسىپ، سالانىڭ دامۋىنا سەرپىن بەرگىسى كەلەدى.
"رەال مادريدتەگى" جۇمىس – البينا ءۇشىن مانساپ ەمەس، ەرەكشە تاجىريبە. ونىڭ نەگىزگى باعىتى – ءوزىنىڭ ماركەتينگ اگەنتتىگىن سپورت سالاسىنا باعىتتاپ، حالىقارالىق دەڭگەيگە شىعارۋ. ارمانى – سپورت ماركەتينگىنىڭ قازاقستاندىق مەكتەبىن قالىپتاستىرۋ.
قورىتىندىلاي كەلە، پاۆلوداردان باستالعان جول سانتياگو بەرنابەۋگە دەيىن جەتتى. بۇل – جاي وقيعا ەمەس، تاباندىلىق پەن ىزدەنىمپازدىقتىڭ كورىنىسى. ەڭ باستىسى – وزىڭە سەنۋ، تاۋەكەل ەتە ءبىلۋ جانە ارماننان باس تارتپاۋ.