جول-جونەكەي جابايى اڭدار كەزدەسپەي-اق قويسا دەپ تىلەدىم...
نۇر-سۇلتان قالاسىنىڭ تۇرعىنى ايگەرىم ءالىموۆا 4270 شاقىرىمدىق تىنىق مۇحيتى جوتاسىن (Pacific Crest Trail - PCT) جاياۋ ءجۇرىپ ءوتتى، دەپ حابارلايدى Almaty-akshamy.kz.
Tengritravel.kzء-تىڭ مالىمەتىنشە، وتانداسىمىز مەكسيكا شەكاراسىنان كاناداعا دەيىنگى شولەيتتى، بيىك تاۋلى ءارى جابايى جانۋارلارى كوپ ارالىقتى 4،5 ايدا ءجۇرىپ وتكەن.
«العاش تىنىق مۇحيتى جولى جايلى امەريكالىق جازۋشى شەريل سترەيدتىڭ اۆتوبيوگرافياسى بويىنشا تۇسىرىلگەن «جابايى» فيلمىنەن ءبىلدىم. ءقاۋىپتى ساياحات ءوزىڭىزدى تابۋدىڭ جولى ىسپەتتى. بۇل فيلم ماعان قاتتى ۇنادى، ويتكەنى باس كەيىپكەر ەكەۋىمىزدىڭ جولىمىز ۇقساس بولدى»،-دەيدى ءا. ءالىموۆا.
كەيىن ول وسىنداي ساياحاتتى جالعىز ءوزىم ەڭسەرە الامىن با دەپ كوپ ويلانعان.
«ول كەزدە زاڭگەر بولىپ جۇمىس ىستەيتىن ەدىم. ءبىر كۇنى ۇيگە كەلىپ، جۇمىستان شىعامىن دا ۆەلوسيپەدپەن ساياحاتتاۋعا شىعامىن دەپ ايتتىم. باسىندا جاقىندارىم ولاي ىستەمە دەپ مەنى رايسىمنان قايتارعىلارى كەلدى، ءبىراق سوڭىندا مەنى قولدادى. جۇمىستان شىققان كەزىمدە قۇربىم اقش-قا بارۋ ءۇشىن گرين-كارتاعا ءوتىنىم بەردى. بۇل يدەياعا باستاپقىدا ءمان بەرمەدىم، كەيىن مەن دە ءوتىنىم بەردى، ءبىراق بۇل قادام ءومىرىمدى 360 گرادۋسقا وزگەرتەدى دەپ ويلامادىم»،-دەيدى ساياحاتشى.
ايگەرىم جۇمىستان شىققان سوڭ ۆەلوسيپەدپەن ساياحاتتاۋعا اتتانىپ، قىرعىزستان، تاجىكستان، گرۋزيا، ارمەنيا، تۇركيا جانە قازاقستاننىڭ جارتى بولىگىن ارالاپ شىققان.
«2018 جىلى اقش-قا گرين-كارتانى ۇتىپ الدىم. ال، 2019 جىلى شۋاقتى كاليفورنياعا قونىس اۋداردىم. 2020 جىلدىڭ باسىندا تىنىق مۇحيتى جولىمەن ءجۇرىپ ءوتۋدى جوسپارلادىم، الايدا پاندەميا باستالىپ، ساياحاتتى 2021 جىلعا قالدىرۋعا تۋرا كەلدى»،-دەيدى ول.
ساياحات بارىسىندا ول شولەيتتى جانە مۇزدى قىراتتاردى باسىپ وتكەنىن، جول جونەكەي جابايى اڭدارعا تاپ بولعانىن ايتادى.
«جولعا شىققاندا جابايى اڭدار شىقپاي-اق قويسا ەكەن دەپ تىلەدىم. الايدا 600 شاقىرىم جول جۇرگەن سوڭ قوڭىر ايۋمەن كەزدەستىم. جولعا شىقپاس بۇرىن اڭداردى كورسەڭ قوزعالما دەگەن كەڭەس العانمىن. دەگەنمەن ماعان قاراعاندا ايۋ قاتتى قورىققان سياقتى كورىندى. كەيىن ورماندا جالعىز اياق جولمەن كەلە جاتقانىمدا كەنەتتەن الدىمنان قارا ايۋ شىعا كەلدى. ءۇنسىز تۇرا قالدىم، ول كەلىپ مەنى يىسكەلەدى دە، ءوز جونىنە كەتتى»،-دەيدى ايگەرىم.
سونداي-اق جول-جونەكەي كەزدەسكەن جولاۋشىلار قازاقستاننان كەلگەن ساياحاتشىنى العاش كورگەندەرىن ايتىپتى.
«ساياحات كەزىندە 4500 مەترلى تاۋلاردى باسىپ ءوتۋ قيىن بولدى. وعان ءبىر كۇن ۋاقىتىڭ كەتەدى. جالپى 4،5 اي جۇرگەندە ونىڭ 20-25 كۇنى ەلدىمەكەندەرگە تۇراقتاۋعا كەتتى. ياعني، دەمالىپ، قاجەتتى ازىق-تۇلىك پەن سۋ الۋ ءۇشىن توقتاپ وتىردىم. جول بويىندا 100-110 كۇنىم كەتتى»،-دەيدى جاس ساياحاتشى.