حالىقارالىق كاراتە فەدەراسياسى (WKF) جاڭارتىلعان رەيتينگ كەستەسىن جاريالادى، جانە قازاقستاندىق ءمولدىر جاڭبىرباي 50 كەلىگە دەيىنگى سالماقتا كوش باسىنا شىقتى، دەپ حابارلايدى aqshamnews.kz
ءمولدىر جاڭبىرباي جاقىندا پاريجدە وتكەن حالىقارالىق رەيتينگتىك كاراتە1 پرەمەر ليگاسىندا قولا مەدال يەلەنگەن بولاتىن. بۇل تاماشا ناتيجە ونىڭ الەمدىك رەيتينگتە ءبىرىنشى ورىنعا كوتەرىلۋىنە مۇمكىندىك بەردى.
قازىرگى رەيتينگ بويىنشا:
- ءمولدىر جاڭبىرباي (قازاقستان) – 5490 ۇپاي
- يورگەليس سالازار (ۆەنەسۋەلا) – 5350 ۇپاي
- ەما سگاردەللي (حورۆاتيا) – 3312 ۇپاي
ايتا كەتەيىك، ءمولدىر جاڭبىرباي 2023 جىلى كاراتەدەن الەم چەمپيونى اتانعان تۇڭعىش قازاق قىزى. سونىمەن قاتار، ول 2021 جىلعى ازيا چەمپيوناتىندا التىن مەدال، 2023 جىلعى ازيا چەمپيوناتىندا كۇمىس مەدال جەڭىپ العان. حانچجوۋداعى ازيا ويىندارىندا دا ەكىنشى ورىندى يەلەنگەن بولاتىن.
ءمولدىردىڭ بۇل جەتىستىكتەرى تەك سپورتتىق عانا ەمەس، قازاق سپورتشىلارىنىڭ حالىقارالىق ارەنادا تابىستى بولاتىنىن كورسەتەتىن ۇلكەن ۇلگى.