قازاقستاننىڭ كلاسسيك اقىنى، مادەنيەت جانە قوعام قايراتكەرى ەسەنعالي ءابدىجاپپار ۇلى راۋشانوۆتىڭ قۇرمەتىنە ورناتىلعان مەموريالدىق تاقتانىڭ اشىلۋ سالتاناتى ءوتتى.
مەموريالدىق تاقتانىڭ اشىلۋ سالتاناتىنا اقىننىڭ جاقىن تۋىستارى، دوستارى جانە ماڭعىستاۋ وبلىسىنان كەلگەن قوناقتار قاتىستى. ءىس-شارا بارىسىندا الماتى قالاسى مادەنيەت باسقارماسىنىڭ باسشىسى عاني مايلىبايەۆ قۇتتىقتاۋ ءسوز سويلەدى.
– ەسەنعالي راۋشانوۆتىڭ ءاربىر سوزىندە، ءاربىر ارىپىندە قۇلاقتا قالاتىن، ەرەكشە ىرعاق بار ەدى. ارتىنان وشپەس ءىز قالدىرعان تۇلعا. مىقتى شاكىرتتەر، جاقسى ۇرپاق تاربيەلەپ قالدىردى. تاريحتا قالعان ەسىمى وشپەك ەمەس. شىعارمالارى قوعام مادەنيەتىن دامىتۋعا، رۋحىن كوتەرۋگە ءوز ۇلەسىن قوسىپ، دارىپتەلە بەرسە دەيمىز. مەكتەپ قابىرعالارىندا، جوعارى وقۋ ورىندارىندا اعامىزدىڭ ەسىمى ايتىلىپ ۇلكەن دەڭگەيدەگى كەشتەر وتكىزىلە بەرەدى. بۇگىنگى تاقتانىڭ اشىلۋى ءبىر تاريحي وقيعا، – دەدى ع.ايدار ۇلى.
مەموريالدىق ەسكەرتكىشتىڭ اشىلۋىنا كۋا بولعاندار قاتارىندا اقىن، مەملەكەتتىك سىيلىقتىڭ لاۋرەاتى، قوعام قايراتكەرى تەمىرحان مەدەتبەك پەن پروفەسسور، پەداگوگيكا عىلىمىنىڭ دوكتورى جاۋىنباي قارايەۆ ءوز ويلارىمەن ءبولىسىپ، جىلى لەبىزدەرىن ءبىلدىردى.
– قازاق پوەزياسىنداعى ءىرى تۇلعالاردىڭ ءبىرى وسى ەسەنعالي راۋشانوۆ بولدى. ونىڭ رۋحاني ولەڭدەرى ەشقاشاندا توزبايدى، حالىق اۋزىنان تۇسپەسى بەلگىلى. جازعان ولەڭدەرى ەلدىڭ، جەردىڭ، قوعام مەن الەۋمەتتىك جاعداي تۋرالى بولدى. حالىقتىڭ ويىندا نە بولسا، سونىڭ ءبارىن شىعارمالارىندا جازدى. ول ابىرويمەن كەلىپ، ابىرويمەن كەتكەن اقيىق اقىن، – دەدى ت.مەدەتبەك.
– بۇل مەموريالدىق تاقتانىڭ اشىلۋى ۇلكەن مادەني جاڭالىق. اقىندىق جولىنا قارايتىن بولساق، ەسەنعالي ءوزىنىڭ كوكمويناق جىرلارىمەن ەرەكشەلەنەتىن. تالاي جارىستاردان بايگە باستاپ دارا كەلەتىن. سونىڭ ارقاسىندا جاس كەزىنەن ۇلكەن بەلەستەردەن كورىنەتىن، كوزىنىڭ تىرىسىندە كلاسسيك اقىن اتاندى. ونىڭ جىرلارى ۇلكەن فيلوسوفيالىق كاتەگوريالارعى تولى تەرەڭ ماعىنالى تۋىندىلار. شىعىستىڭ سارىنىمەن جازىلاتىن جىراۋلىق سيپاتقا يە شىعارمالارى بار. ول ءقازىر قازاق پوەزياسىنىڭ جۇلدىزىنا اينالدى. ونىڭ جۇلدىزى ەسەنيننىڭ جۇلدىزىنىڭ جانىندا جارقىراپ تۇر دەپ ايتا الامىن، – دەدى ج.قارايەۆ.
قازاقتىڭ باسىنا بىتكەن دارىندى اقىنى ەسەنعالي راۋشانوۆتىڭ قۇرمەتىنە قويىلعان ەسكەرتكىش-تاقتاسى ءوزى تۇرعان ۇيدە ورناتىلىپ وتىر. مەموريالدىق تاقتا ورناتىلعان عيماراتتىڭ مەكەنجايى: «سامال-2» شاعىناۋدانى، 42ء-ۇي (مەڭدىقۇلوۆ كوشەسىنىڭ قيىلىسى).
