وتاندىق كينويندۋستريا الەمى ءتورت سەريالى “قورقىت” بيوگرافيالىق دراماسىمەن تولىقتى.
تەلەحيكايانىڭ ءتۇسىرىلىمى الماتى وبلىسى مەن وزبەكستان رەسپۋبليكاسىنداعى حيۋا، فەرعانا، بۇقارا قالالارىندا ءوتتى. تۋىندى Qazaqstan ۇلتتىق تەلەارناسىنىڭ تاپسىرىسى بويىنشا ءتۇسىرىلدى، دەپ حابارلايدى اlmaty-akshamy.kz.
جوبانىڭ تاريحي كەڭەسشىسى ءارى سەناريي اۆتورى – ەتنوگراف بەرىك ءجۇسىپ. رەجيسسەرى – قاناعات مۇستافين. قورقىتتىڭ ءار كەزەڭدەگى رولدەرىن ءدىنيسلام نۇرماعامبەت، ءادىل احمەتوۆ جانە ايدوس بەكتەمىر سومدايدى. سونىمەن قاتار نەگىزگى تاريحي رولدەردى ەركەبۇلان دايىروۆ، زارينا كارمەن، مەدعات ءومىرالى وينايدى. سەريالدا قىرعىزدىڭ اتاقتى ماناسشىسى رىسباي يساقوۆ پەن تانىمال اكتەر اسكات سۋلايمانوۆ تا بوي كورسەتەدى.
تەلەحيكايا سيۋجەتىندە قورقىتتىڭ دۇنيەگە كەلۋى، بالالىق شاعى، جەتكىنشەك كەزىنەن باستاپ، ونىڭ ساۋەگەي، ابىز رەتىندە قالىپتاسۋ جولى كورسەتىلەدى. تەلەحيكايا سەنارييى الەمدىك دەڭگەيدە زەرتتەلگەن «قورقىت اتا» كىتابىنا، اتاپ ايتقاندا “سالور قازاننىڭ ءۇيىنىڭ شابىلعانى تۋرالى جىر” نەگىزىندە تۇسىرىلگەن. جوبا پروديۋسەرى شولپان باتىربايەۆانىڭ ايتۋىنشا، جاڭا تەلەحيكايانىڭ سەنارييى ەرەكشە بولادى.
– تۋىندى ەڭ اۋەلى جاس اۋديتورياعا ارنالىپ ءتۇسىرىلدى. قازىرگى جاستاردىڭ سۇرانىسى باسقا. سوندىقتان تاريحي فيلم، سەريال تۇسىرگەندە جاستاردىڭ ءتىلىن تۇسىنە ءبىلۋ ماڭىزدى. قارت قورقىتتىڭ وبرازى جاستارعا قىزىق بولماس ەدى. سول ءۇشىن ءتۇسىرىلىم توبى كوپ كەڭەسىپ، حرونولوگيالىق رەتتىلىككە، بيوگرافياعا نەگىزدەلگەن سيۋجەت قۇراستىردى، – دەيدى پروديۋسەر. شولپان باتىربايەۆا بۇل تۋىندىنى حالىقارالىق كينوسەريال دەپ اتاۋعا تولىق نەگىز بار دەيدى.
– سەريال كاستينگىنە ۇلكەن جاۋاپكەرشىلىكپەن قارادىق. اكتەرلار قۇرامىندا ەلىمىزدەگى ەڭ ۇزدىك ماماندارى جينالعان. سونىمەن قاتار تانىمال قىرعىز اكتەرى اسكات سۋلايمانوۆ پەن ايگىلى ماناسشىسى رىسباي يساقوۆتىڭ دا رولدەرى بار. بۇعان قوسا قاڭتار ايىنداعى تۇسىرىلىمدەر وزبەكستان جەرىندە ءوتتى. ول كەزدە ءتۇسىرىلىم توبىنا وزبەكتىڭ كينو سالاسىنداعى ۇزدىكتەرى دە قوسىلدى. سوندىقتان تۇركى ەلدەرى ورتاق اڭىز جايلى العاشقى سەريالىمىز حالىقارالىق تۋىندى دەۋگە بولادى، – دەيدى جوبا پروديۋسەرى شولپان باتىربايەۆا.
«قورقىت» تاريحي بيوگرافيالىق دراماسى «قازاقستان» تەلەراديوكورپوراسياسىنىڭ وزگە مەملەكەتپەن بىرلەسە تۇسىرگەن العاشقى تەلەحيكاياسى. تۋىندى 16، 17 جەلتوقسان كۇندەرى ساعات 14:40-تا Qazaqstan ۇلتتىق ارناسىنىڭ ەفيرىنەن كورسەتىلەدى.
