وسكەمەندەگى قاجىمۇقان مۇڭايتپاسوۆ اتىنداعى جەكپە-جەك سارايىندا ۇلتتىق ۇلان باس قولباسشىسىنىڭ كۋبوگى ءۇشىن قازاقشا كۇرەستەن جەكە جانە كوماندالىق چەمپيونات ءوتتى، دەپ حابارلايدى اlmaty-akshamy.kz ۇلتتىق ۇلاننىڭ باسپا ءسوز قىزمەتىنە سىلتەمە جاساپ
جارىس 1995 جىلعى 7 ساۋىردە تاجىك-اۋعان شەكاراسىندا قازا تاپقان قازاقستان ءىىم ىشكى اسكەرىنىڭ 17 جاۋىنگەرىن ەسكە الۋعا ارنالدى.
چەمپيوناتقا قاتىسۋشىلار الدىمەن تاجىك-اۋعان شەكاراسىندا قازا تاپقان جاۋىنگەرلەردى ءبىر مينۋت ۇنسىزدىكپەن ەسكە الدى.
«شىعىس» وڭىرلىك قولباسشىلىعىنىڭ قولباسشىسى، گەنەرال-مايور ارمان جۇماعالييەۆ ۇلتتىق سپورتتى ۇلىقتاۋ ماڭىزدى ەكەنىن اتاپ ءوتتى.
-پرەزيدەنت قاسىم-جومارت توقايەۆ قازاقستان حالقىنا جولداۋىندا سالاۋاتتى ءومىر سالتىن جانە بۇقارالىق سپورتتى ونىڭ ىشىندە ۇلتتىق سپورت تۇرلەرىن دامىتۋدى ناسيحاتتاۋ مەملەكەتتىڭ ماڭىزدى مىندەتى ەكەنىن ايتتى. قازاق كۇرەسى – اسكەري قىزمەتشىلەردىڭ دەنەسىن شيراتىپ، ەپتىلىككە باۋليتىن ۇلتتىق سپورت ءتۇرى. كۇرەس جىگىتتەرىمىزدىڭ رۋحىن كوتەرىپ، ءتوزىمىن شىندايدى، شىدامدى بولۋعا تاربيەلەيدى. مۇنىڭ ءبارى اسكەري قىزمەتشىلەرىمىزگە جۇكتەلگەن تاپسىرمالاردى ورىنداۋدا زور پايداسىن تيگىزەدى، - دەدى ول.
چەمپيوناتقا 7 كوماندا قاتىستى. ولار – «شىعىس»، «وڭتۇستىك»، «ورتالىق»، «باتىس» وڭىرلىك قولباسشىلىقتارىنىڭ، ۇلتتىق ۇلان اكادەمياسىنىڭ جانە تىكەلەي باعىنىستاعى №6654 اسكەري ءبولىمى مەن №5573 بريگاداسىنىڭ قۇراما كوماندالارى.
ۇلتتىق ۇلان باس قولباسشىلىعى دەنە دايارلىعى جانە سپورت ءبولىمىنىڭ باسشىسى ءساتجان ابىشيەۆ جارىستىڭ دەڭگەيى جوعارى ەكەنىن اتاپ ءوتتى.
-مۇندا رەسپۋبليكالىق دەڭگەيدە ب ا ق سىناپ جۇرگەن سپورتشى ساربازدارىمىز دا قاتىسىپ جاتىر. بيىل ۇلتتىق سپورت ءتۇرىن دامىتۋ ءۇشىن ىشكى ىستەر ءمينيسترى مەن ونىڭ ورىنباسارى ءارى ۇلتتىق ۇلاننىڭ باس قولباسشىسى گەنەرال-لەيتەنانت ەركىن بوتاقانوۆتىڭ قولداۋىمەن العاش رەت وسىنداي چەمپيونات وتكىزىلىپ وتىر. بۇگىنگى ءبىزدىڭ بىرىنشىلىك ىرىكتەۋ ەسەبىندە بولادى، - دەدى پولكوۆنيك.
ونىڭ ايتۋىنشا، وسى چەمپيوناتتا جەڭىسكە جەتكەندەر 1-3 ءساۋىر ارالىعىندا ششۋچينسكتە وتەتىن ىشكى ىستەر ءمينيسترىنىڭ كۋبوگىندا ۇلتتىق ۇلاننىڭ نامىسىن قورعايدى.
- 21-23 مامىر ارالىعىندا قىزىلوردادا ۇقك كۋبوگى ۇيىمداستىرىلادى. توپ جارعان ساربازدار بيىل شىلدەدە استانادا وتەتىن «قازاقستان بارىسى» سايىسىنا دا قاتىسا الادى، - دەدى پولكوۆنيك ءساتجان ابىشيەۆ.
جارىستىڭ قورىتىندىسى بويىنشا كوماندالىق ەسەپتە باس جۇلدەنى استانالىق №5573 بريگاداسىنىڭ قۇراماسى جەڭىپ السا، ەكىنشى ورىندى «باتىس» وڭىرلىك قولباسشىلىعىنىڭ قۇراما كومانداسى يەلەندى. ءۇشىنشى ورىن "ورتالىق" وڭىرلىك قولباسشىلىعىنىڭ قۇراماسىنا بۇيىردى.