بۇگىن قالىڭ قازاق جۇرتى ايتۋلى اقىن، قازاقستاننىڭ ەڭبەك سىڭىرگەن قايراتكەرى نەسىپبەك ايتۇلىن اقتىق ساپارعا شىعارىپ سالدى. اردا ازاماتپەن قوشتاسۋ ءراسىمى استاناداعى ازىرەت سۇلتان مەشىتىندە ءوتتى، دەپ حابارلايدى اlmaty-akshamy.kz.
قارالى جيىنعا مارقۇمنىڭ كوزىن كورگەن ارىپتەستەرى، دوس-جاقىندارى مەن تۋعان-تۋىستارى جينالدى. ساناۋلى عۇمىرىندا وقىرماننىڭ شەكسىز سۇيىسپەنشىلىگىنە بولەنگەن اقىندى ەل-جۇرتى قيماستىقپەن شىعارىپ سالدى.
نەسىپبەك ايت ۇلىنىڭ قازاسى كوپتىڭ قابىرعاسىن قايىستىرىپ كەتتى. قالامگەر اۋىر دەرتپەن ارپالىسىپ، اقىرى ماڭگىلىك مەكەنىنە كەتە باردى. جالىن عۇمىر ەرتە سونگەنىمەن، ءسوز زەرگەرىنىڭ ارتىندا وشپەس ءىزى قالدى. «سارىجايلاۋىم، ءانجايلاۋىم» دەپ قالام تەربەگەن اقىن شۇرايلى دا، شىرايلى شۇبارتاۋ وڭىرىندە ومىرگە كەلگەن. تاڭعاجايىپ تارباعاتايدىڭ تاسىندا كىندىگى كەسىلىپ، تال بەسىگىندە تەربەلىپ ءوستى.
– دارىندى، تالانتتى، اقىننىڭ ومىردەن ءوتۋى – حالقىمىزدىڭ رۋحانياتى، ۇرپاعى ءۇشىن ورنى تولمايتىن ۇلكەن قاسىرەت. نەساعاڭ ومىردە دە، ونەردە دە، ادەبيەتتە دە وتە بيىكتە بولدى. ايتماتوۆتىڭ «سەن بيىكسىڭ» دەيتىن. نەسىپبەك كوكەمىز – بيىك اقىن، ازامات، تۇلعا! – دەدى ق ر ەڭبەك سىڭىرگەن ءارتىسى، كينورەجيسسەر تالعات تەمەنوۆ.
ادال ەڭبەك، ادال قىزمەت. اردا ۇلدى اتاق-ابىرويدان دا كەم قىلمادى. مەملەكەتتىك سىيلىقتىڭ لاۋرەاتى، قازاقستاننىڭ ەڭبەك سىڭىرگەن قايراتكەرى، «پاراسات»، «بارىس» وردەندەرىن كەۋدەسىنە جارقىراي تاقتى. باستى ماراپات - تۋعان ەلدىڭ ىقىلاسى. كۇنى كەشە مەملەكەت باسشىسى دا قازاعا قايعىرىپ كوڭىل ايتتى. تاۋەلسىزدىك جىرشىسىنا اينالعان اقىننىڭ تارتىمدى تۋىندىلارى وقىرماندار تاراپىنان جوعارى باعالانعانىن جەتكىزدى. اقتىق ساپارىندا كوپشىلىك قالامگەردى «قاراپايىمدىلىقتىڭ، ادامدىقتىڭ تۋىن جىقپادى» دەپ ەسكە الدى.
– جالعىز عانا اقىن ەمەس، ادام رەتىندە قاتتى سىيلايتىن. ۇيرەتەتىن. ون التى جاسىمدا اعام بولىپ جولىققان، ءومىردىڭ اياعىنا دەيىن جاقسىلىققا جەتەلەگەن مەيىرىمدى ادام ەدى. مەن وتە قۋانىشتى كۇندەرىمدى سول كىسىمەن وتكىزدىم. ونىڭ سىيلىق العان، ەلگە تانىلعان شاقتارىندا بىرگە بولدىق، – دەدى الىقارالىق «الاش» ادەبي سىيلىعىنىڭ لاۋرەاتى مىلتىقباي ەرىمبەتوۆ
نەسىپبەك ايت ۇلىنىڭ اتاسى، اكەسى دە اقىنجاندى ادام بولعان. «قارا ولەڭنىڭ شەكپەنىن كيگەن» ۇل وسىدان سوڭ بابا ءىزىن جالعاستىردى. جۇرەگىنىڭ تۇبىنەن ءسۇزىپ، تۇنىعىنان العان تۇجىرىمدارىن جازبا كىتاپ قىپ جازدى. نەبارى 23 جاسىندا تۇڭعىش كىتابىن جارىققا شىعارىپ ۇلگەرگەن. «اكە تۋرالى سىر»، «جاڭبىر ءانى»، «تۇندەلەپ ۇشقان تىرنالار»، «رۋحىمنىڭ پاديشاسى» سىندى اۋدارمالاردىڭ اۆتورى. تۇرىك، جۇڭگو، فرانسۋز اقىندارىنىڭ ولەڭىن تۋعان تىلىمىزدە سويلەتكەن.