الماتىدا جامبىل اتىنداعى مەملەكەتتىك فيلارمونيانىڭ كامەرالىق زالىنا حالىق قاھارمانى، كۇيشى-كومپوزيتور نۇرعيسا تىلەندييەۆتىڭ اتى بەرىلدى، دەپ حابارلايدى almaty-akshamy.kz
سالتاناتتى ءىس-شاراعا مارقۇمنىڭ جارى داريعا، قىزى ءدىنزۋحرا تىلەندييەۆا جانە مادەنيەت سالاسىنىڭ وكىلدەرى قاتىستى. قوناقتار كۇيشى-كومپوزيتوردى ەسكە الىپ، ۇلتتىق ونەرگە سىڭىرگەن ولشەۋسىز ۇلەسىن ايتتى. ەسكەرتكىش تاقتا قويىلعان جامبىل اتىنداعى قازاق مەملەكەتتىك فيلورمونياسىندا كومپوزيتور «وتىرار سازى» ءانسامبلىن قۇرىپ، وركەستر دەڭگەيىنە كوتەرگەن ەدى.
سونداي-اق مەموريالدى تاقتانىڭ اشىلۋ سالتاناتىنا قاتىسقان كوپشىلىك نۇرعيسا تىلەندييەۆ اتىنداعى مۇراجايدىڭ ەكسپوناتتار كورمەسىن دە ارالادى. كوپشىلىك ونىڭ قاتال دا سىرباز مىنەزىن ەسكە الدى.
«نۇر-اعاڭنىڭ ءومىرىنىڭ جارتىسى وسى زالدا وتكەن شىعار. ءبىزدىڭ قازاق دەگەن حالىق امان تۇرعاندا، نۇر-اعاڭنىڭ اتى ەش وشپەيدى دەپ سەنەمىن. ونىڭ ەڭبەكتەرى – ولمەيتىن ونەر»، – دەدى نۇرعيسا تىلەندييەۆتىڭ جارى داريعا تىلەندييەۆا.
«ول كىسى – فەنومەن. قازاق حالقىنىڭ باعى ءۇشىن تۋعان دارىن يەسى»، – دەدى ق ر ۇعا اكادەميگى، مەملەكەت جانە قوعام قايراتكەرى ورازالى سابدەن.