الماتى قالالىق كارديولوگيالىق ورتالىعى رەسمي تۇردە جۇرەك ترانسپلانتاسياسىن جۇرگىزۋگە ۋاكىلەتتى مەديسينالىق ۇيىمدار تىزىمىنە ەنگىزىلدى. بۇل تۋرالى الماتى قالاسى قوعامدىق دەنساۋلىق ساقتاۋ باسقارماسىندا حابارلادى.
اتالعان شەشىمدى دەنساۋلىق ساقتاۋ مينيسترلىگىنىڭ ترانسپلانتاسيا جانە جوعارى تەحنولوگيالىق مەديسينالىق قىزمەتتەردى ۇيلەستىرۋ جونىندەگى رەسپۋبليكالىق ورتالىق پەن «University Medical Center» (UMC) كورپوراتيۆتىك قورى بىرلەسىپ قابىلداعان.
ورتالىقتا مۇنداي جوعارى كۇردەلى وتانى ورىنداۋ ءۇشىن بارلىق جاعداي جاسالعان: جوعارى بىلىكتى كارديوحيرۋرگ، انەستەزيولوگ پەن رەانيماتولوگ ماماندار جۇمىس ىستەيدى، زاماناۋي دياگنوستيكالىق جانە ەمدەۋ ادىستەرى ەنگىزىلگەن، حالىقارالىق ستاندارتتارعا ساي جوعارى تەحنولوگيالىق جابدىق ورناتىلعان.
قوعامدىق دەنساۋلىق ساقتاۋ باسقارماسىنىڭ مالىمەتىنشە، قالالىق كارديولوگيالىق ورتالىقتىڭ ترانسپلانتاسيالىق ورتالىقتار تىزىمىنە ەنگىزىلۋى - وتاندىق كارديوحيرۋرگيانىڭ دامۋى جولىنداعى ماڭىزدى قادام. بۇل الماتىدا اسا كۇردەلى وتانى ورىنداۋعا مۇمكىندىك بەرىپ، پاسيەنتتەردىڭ جوعارى تەحنولوگيالىق مەديسينالىق كومەككە قولجەتىمدىگىن ارتتىرۋعا جانە ونىڭ ساپاسىن كوتەرۋگە ىقپال ەتەدى.