الماتى قالاسىندا جاستاردىڭ قارجىلىق ساۋاتتىلىعىن ارتتىرۋعا باعىتتالعان ماڭىزدى جوبا ءوز مارەسىنە جەتتى.
پرينتمەديا تەحنولوگيالار كوللەدجى وقۋ-ادىستەمەلىك بىرلەستىگىنىڭ ۇيىمداستىرۋىمەن جانە «AMANAT» پارتياسىنىڭ قولداۋىمەن وتكەن «قارجىلىق ساۋاتتىلىق – تابىس كىلتى» اتتى قالالىق بايقاۋ جاستاردىڭ قارجى مادەنيەتىن دامىتۋعا جانە «قارىزسىز قوعام» ۇلتتىق جوباسىنىڭ ماقساتتارىن قولداۋعا ارنالدى، - دەپ حابارلايدى Aqshamnews.kz.
بايقاۋدىڭ نەگىزگى ماقساتى – ستۋدەنتتەر اراسىندا قارجىلىق ساۋاتتى ءومىر سالتىن قالىپتاستىرۋ، جەكە قارجىنى ءتيىمدى باسقارۋعا باۋلۋ جانە سيفرلىق داۋىردەگى قارجى قۇرالدارىن دۇرىس پايدالانۋعا ۇيرەتۋ بولىپ تابىلادى.
ءىس-شاراعا الماتى قالاسىنداعى تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرى بەلسەنە قاتىستى. ولار قارجى تاقىرىبىنا ارنالعان قىسقامەتراجدى بەينەروليكتەرىن ۇسىنىپ، جەكە تاجىريبەسى مەن شىعارماشىلىق كوزقاراسىن كورسەتتى. جاستار ءوز جۇمىستارىندا العاشقى بيۋدجەتتى قالىپتاستىرۋ، سيفرلىق تەڭگەنىڭ مۇمكىندىكتەرى، قارجىلىق قاتەلىكتەردىڭ الدىن الۋ جانە وز-وزىنە ينۆەستيسيا سالۋ سياقتى وزەكتى ماسەلەلەردى قوزعادى.
بايقاۋ قورىتىندىسى بويىنشا ۇزدىك بەينەروليكتەر ىرىكتەلىپ، جەڭىمپازدار ديپلومدار مەن كۋبوكتارمەن ماراپاتتالدى. سونىمەن قاتار، بەلسەندى قاتىسۋشىلارعا ارنايى العىس حاتتار تابىستالدى. ءىس-شارا بارىسىندا جاستار قارجىنى ءتيىمدى باسقارۋ، تابىس پەن شىعىندى جوسپارلاۋ جانە سانالى تۇتىنۋ مادەنيەتىنىڭ ماڭىزىن تەرەڭ ءتۇسىندى.
بۇل باستاما ەلىمىزدە «AMANAT» پارتياسىنىڭ باستاماسىمەن جۇزەگە اسىرىلىپ جاتقان «قارىزسىز قوعام» ۇلتتىق جوباسىنىڭ جالعاسى رەتىندە جاستار اراسىندا قارجىلىق مادەنيەتتى كەڭىنەن ناسيحاتتاۋعا مۇمكىندىك بەردى. اتالعان جوبا اياسىندا رەسپۋبليكا بويىنشا 845 مىڭنان استام ازامات، سونىڭ ىشىندە 18 مىڭنان اسا الماتىلىق، قارجىلىق ساۋاتتىلىق بويىنشا تەگىن وقۋدان ءوتىپ، جەكە بيۋدجەتتى باسقارۋ مەن قارىزدىق جۇكتەمەنى ازايتۋ داعدىلارىن مەڭگەردى.
«قارجىلىق ساۋاتتىلىق – تابىس كىلتى» بايقاۋى جاستاردىڭ قارجىلىق مادەنيەتىن قالىپتاستىرۋعا، جاۋاپتى شەشىم قابىلداۋعا جانە ەكونوميكالىق تۇرعىدان ەركىن بولۋعا باعىتتالعان ماڭىزدى قادام بولدى.