الماتى قالالىق كارديولوگيالىق ورتالىعىندا كالسييلەنگەن ارتەريانى ەمدەۋدىڭ زاماناۋي تەحنولوگياسى ەنگىزىلدى، - دەپ حابارلايدى Aqshamnews.kz.
الماتى قالالىق كارديولوگيالىق ورتالىعىنىڭ باسپا ءسوز قىزمەتىنىڭ مالىمەتىنشە، كەيىنگى جىلدارى دارىگەرلەرگە كالسييلەنگەن ارتەريالىق اتەروسكلەروز دياگنوزى قويىلعان پاسيەنتتەر ءجيى جۇگىنەدى. بۇل قان تامىرى قابىرعالارى قاتايىپ، يىلگىشتىگىن جوعالتىپ، ستاندارتتى باللوندىق انگيوپلاستيكامەن ولاردى كەڭەيتۋ مۇمكىن بولمايتىن جاعداي.
ادەتتە ارتەريا تارىلعان كەزدە ەمدەۋ ءۇشىن باللون قولدانىلادى: ول زاقىمدانعان تامىر بولىگىنە ەنگىزىلىپ، 10-14 اتموسفەرا قىسىممەن ۇرلەنەدى. بۇل تامىردى كەڭەيتىپ، قالىپتى قان اعىمىن قالپىنا كەلتىرەتىن ستەنت ورناتۋعا مۇمكىندىك بەرەدى.
«الايدا ايقىن كالسينوز كەزىندە جاعداي الدەقايدا كۇردەلى. كالسييلەنگەن تۇيىنشەكتىڭ تىعىزدىعى سونداي، ونى 20 اتموسفەراعا دەيىنگى قىسىمدا دا كەڭەيتۋ مۇمكىن ەمەس، وسىلايشا باللون تولىق اشىلماي قالادى. مۇنداي جاعدايدا قىسىمدى 30 اتموسفەرا نە ودان جوعارى دەڭگەيگە دەيىن ارتتىرۋ ارتەريانىڭ جارىلۋ ءقاۋپىن تۋعىزادى، سوندىقتان بۇل پروسەدۋرا وتە ءقاۋىپتى»، - دەيدى ينتەرۆەنسيالىق كارديولوگيا بولىمشەسىنىڭ مەڭگەرۋشىسى ورازبەك ساحوۆ.
بۇل ماسەلەنىڭ شەشىمى - جاڭا تەحنولوگيا، ۋلترادىبىستىق ليتوتريپسيا بولدى.
پروسەدۋرا كەزىندە زاقىمدانعان ايماققا ارنايى باللون ەنگىزىلەدى. باللون ۇرلەنگەن كەزدە ونىڭ ىشىندە ۋلترادىبىستىق يمپۋلس تۇزىلەدى، ول كالسييلەنگەن تۇيىنشەكتى ىدىراتادى. تولقىن كالسييگە باعىتتالعان اسەر ەتەدى دە، ونىڭ قۇرىلىمىن بۇزادى، ال تامىر قابىرعاسىنىڭ جۇمساق تىنىنە زاقىم كەلتىرمەيدى.
مۇنداي وڭدەۋدەن كەيىن باللون قايتا ۇرلەنىپ، تامىر وڭاي كەڭەيەدى، ستەنت ورناتۋ ءقاۋىپسىز ءارى ءتيىمدى وتەدى.
ۋلترادىبىستىق ليتوتريپسيا – ارتەريانىڭ جارىلۋ ءقاۋپىنسىز كالسيي شوگىندىلەرىن ءتيىمدى جويۋعا، اۋىر كالسينوز كەزىندە دە ستەنتتى ءساتتى ورناتۋعا جانە قان اينالىمىن جىلدام قالپىنا كەلتىرۋگە مۇمكىندىك بەرەتىن يننوۆاسيالىق ءادىس.
«ءبىزدىڭ ورتالىقتا ۋلترادىبىستىق ليتوتريپسيا ادىسىمەن ءۇش ءساتتى وتا وتكىزىلدى. بارلىق جاعدايدا ارتەريا تولىق اشىلىپ، ستەنت ەش قيىندىقسىز ورناتىلدى. پاسيەنتتەردىڭ جاعدايى قاناعاتتانارلىق، قان اينالىمى قالپىنا كەلدى، اۋىرسىنۋ بەلگىلەرى جويىلدى»، - دەيدى ورازبەك ساحوۆ.
قالالىق كارديولوگيالىق ورتالىقتا ەنگىزىلگەن زاماناۋي تەحنولوگيا دارىگەرلەرگە قان تامىرىنىڭ كۇردەلى زاقىمدانۋىنىڭ كەزىندە دە ءتيىمدى ەمدەۋگە مۇمكىندىك بەرىپ، پاسيەنتتەرگە ءقاۋىپسىز ءارى سەنىمدى ەم الۋعا جول اشتى.