اقىن سايات قامشىگەردىڭ «قاراباق» اتتى كولەمدى پوەماسى ازەربايجان تىلىنە اۋدارىلىپ، باكۋ قالاسىنداعى «CN-Poliqraf» باسپاسىنان كىتاپ بولىپ شىقتى. «قاراباق» پوەماسى – باۋىرلاس ەل ازەربايجاننىڭ تاريحى مەن مادەنيەتىن، قاراباقتىڭ ازاتتىق پەن ەرلىك جولىن، باتىرلاردىڭ قاھارماندىعىن، تۇركى حالىقتارىنىڭ بىرلىگىن جىرلايتىن ەرلىك داستانى. كىتاپ ازەربايجانداعى «ايماقتىق قۇقىقتىق جانە ەكونوميكالىق اعارتۋ» قوعامدىق بىرلەستىگى مەن دۇنيەجۇزىلىك جاس تۇرىك جازۋشىلار وداعىنىڭ بىرلەسكەن باستاماسىمەن جارىق كوردى. بۇل پوەما – قازاق پەن ازەربايجان حالىقتارىنىڭ باۋىرلاستىعى مەن دوستىعىنىڭ پوەتيكالىق كورىنىسى.
اقىن بۇل پوەمانى جازاردا ەكى جىل ىزدەنىپ، زەرتتەپ، كوپ كىتاپتار وقىپ، ينتەرنەتتەگى ماتەريالداردى سارالاپ بارىپ جازعانىن ايتادى. سايات قامشىگەر بىرنەشە رەت ازەربايجانعا ارنايى بارىپ، سناريادپەن اتقىلانعان جەرلەردى ءوز كوزىمەن كورىپ، اسكەريلەرمەن كەزدەسكەن، شەيىت بولعان جاۋىنگەرلەردىڭ وتباسىمەن سويلەسكەن. قۇربان بولعان ساربازداردىڭ زيراتىنا زيارات ەتكەن. قاراباقتا شەيىت بولعان قازاق باتىرى ەربول بارىمبەتوۆتىڭ ىنىلەرىمەن، ۇستازدارىمەن، دوستارىمەن اڭگىمەلەسكەن. اقىن وسىنداي ىزدەنىستەردەن كەيىن پوەمانى ەكى ايدا جازىپتى. پوەمانىڭ جازىلۋىنا رۋحاني قولداۋ كورسەتكەن مارقۇم، ازەربايجان ميللي ءماجىلىسىنىڭ دەپۋتاتى، مادەنيەت كوميتەتىنىڭ ءتورايىمى، ازەربايجان حالقىنىڭ ارداقتى قىزى گانيرا پاشايەۆانىڭ ەڭبەگىن اتاپ وتكەن ءجون.
بۇل پوەما الدىمەن 2023 جىلى «تاڭ-شولپان» جۋرنالىنىڭ 5-سانىندا جاريالانعان. «ادەبيەت پورتالىنا» دا شىقتى. قازاق اقىنىنىڭ پوەماسىن ازەربايجان تىلىنە تانىمال اقىن، جۋرناليست ەلشان ءازىم اۋداردى. رەداكتورى اقىن، پروفەسسور راسميا سابىر بولدى. جوبانىڭ جەتەكشىسى – اقىن، حالىقارالىق «الاش» ادەبي سىيلىعىنىڭ لاۋرەاتى اكبار قوشالى. «ايماقتىق قۇقىقتىق جانە ەكونوميكالىق اعارتۋ» قوعامدىق بىرلەستىگىنىڭ ءتورايىمى ارزۋ باعىروۆا پوەمانىڭ ءالعىسوزىن جازعان. كىتاپتىڭ ساراپشىلارى – دۇنيەجۇزىلىك جاس تۇرىك جازۋشىلار وداعىنىڭ ءتوراعاسى ينتيكام ياشار مەن تاريەل احمەدوۆ. ۇيلەستىرۋشىلەرى – ءنيلۋفار ءلاتيف پەن جازۋشى ەتيبار مۇرادحانلى، كىتاپتىڭ ديزاينەرى – جاسارات قاسىموۆ.
قازاق اقىنىنىڭ ازەربايجان تىلىنە اۋدارىلىپ، كىتاپ بولىپ شىققانىن باۋىرلاس ازەربايجان ەلىنىڭ سايتتارى مەن باسىلىمدارى جارىسا جازىپ، اقپارات بەرىپ جاتىر. الداعى ۋاقىتتا قازاقستاندا دا، ازەربايجاندا دا پوەمانىڭ تۇساۋكەسەرى، تانىستىرىلىمى، اۆتوردىڭ قاتىسۋىمەن وقىرماندارمەن كەزدەسۋ، ادەبي، قوعامدىق ءىس-شارالار وتەدى دەپ جوسپارلانۋدا. بۇل پوەمانىڭ تۋىس حالىقتار اراسىنداعى ادەبي بايلانىستىڭ نىعايۋىنا ۇلەس قوسارى ءسوزسىز. بۇل قۋانىشتى حابار تۇركى الەمىنىڭ ىنتىماعى مەن بىرلىگى ءۇشىن ماڭىزدى وقيعا بولىپ وتىر.