الماتىداعى ءابىلحان قاستەيەۆ اتىنداعى مەملەكەتتىك ونەر مۋزەيىندە كورنەكتى سۋرەتشى ورال تاڭسىقبايەۆتىڭ بىرەگەي رەتروسپەكتيۆتى كورمەسى اشىلدى. كورمە وزبەكستاننىڭ مادەنيەت جانە ونەردى دامىتۋ قورىنىڭ (ACDF) ۇيىمداستىرۋىمەن جانە قازاقستان رەسپۋبليكاسىنىڭ مادەنيەت جانە اقپارات مينيسترلىگىنىڭ قولداۋىمەن ۇيىمداستىرىلدى.
«بۇل كورمە قازاقستان مەن وزبەكستان اراسىنداعى مادەني ىنتىماقتاستىقتى نىعايتۋ جولىنداعى تاعى ءبىر قادام ىسپەتتەس. كورمە مۋزەيدىڭ 90 جىلدىق مەرەيتويىمەن قاتار، وعان ۇلتتىق مارتەبە بەرىلگەن جىلى اشىلىپ وتىر، بۇل ەلىمىزدىڭ مادەني ومىرىندەگى ەرەكشە وقيعا»، – دەپ اتاپ ءوتتى ءابىلحان قاستەيەۆ اتىنداعى مەملەكەتتىك ونەر مۋزەيىنىڭ ديرەكتورى گۇلايىم مۇساعۇل قىزى.
بۇل كورمە سۋرەتشىنىڭ سوڭعى 40 جىلداعى اۋقىمدى كارتينالارىن ۇسىنادى. ونەرسۇيەر قاۋىم تاشكەنت قالاسىنداعى مەملەكەتتىك ونەر مۋزەيى مەن ورال تاڭسىقبايەۆتىڭ مۋزەي-ۇيىنەن، نۇكىس قالاسىنداعى قاراقالپاقستان رەسپۋبليكاسى مەملەكەتتىك ونەر مۋزەيىنەن اكەلىنگەن، سونىمەن قاتار ءابىلحان قاستەيەۆ اتىنداعى مەملەكەتتىك ونەر مۋزەيىنىڭ قورىنان الىنعان 78-گە جۋىق كەسكىندەمە جانە گرافيكا تۋىندىلارىن تاماشالاي الادى.
ەكسپوزيسيا – ورال تاڭسىقبايەۆتىڭ ءومىرى، ونىڭ دراماعا تولى شىعارماشىلىق تاعدىرى مەن شەبەردىڭ قولتاڭباسىنىڭ كۇردەلى ەۆوليۋسياسى تۋرالى، باستاپقى كەزەڭدەردەگى مودەرنيستىك ەكسپەريمەنتتەردەن باستاپ، تەرەڭ سيمۆوليزم مەن فيلوسوفيالىق ماعىناعا تولى مونۋمەنتالدى پەيزاجدارعا دەيىن كەڭىنەن تانىستىرادى.
كورمەدە و.تاڭسىقبايەۆتىڭ ورىس اۆانگاردىنىڭ جانە فرانسۋز مودەرنيستەرىنىڭ ىقپالىن كورسەتەتىن العاشقى تۋىندىلارىنا ەرەكشە نازار اۋدارىلادى. ەكسپوناتتار اراسىندا اتاقتى «كۇرەڭ كۇز»، «اۆتوپورترەت» كارتينالارى، سونداي-اق، ۇلى وتان سوعىسى كەزەڭىندەگى تۋىندىلار مەن «جەڭىلدىك» كەزەڭىنىڭ كورنەكتى پەيزاجدارى ۇسىنىلادى.
كورمە ماۋسىمعا دەيىن جالعاسادى.