سەۋلدە ورتالىق ازيا ەلدەرىنىڭ كوكتەم فەستيۆالى ءوتتى.
فەستيۆال بارىسىندا YouTube-تە قازاقشا ءان سالاتىن كورەيالىق ازامات دومبىرا تارتۋدى ۇيرەنىپ جۇرگەنى بەلگىلى بولدى، دەپ حابارلايدى Almaty-akshamy.kz.
Massaget.kzء-تىڭ مالىمەتىنشە، مەرەكەدە كورەرمەندەر قازاقتىڭ ۇلتتىق تاعامدارى مەن ويىندارى، كىتاپ جانە مۋزىكاسىمەن تانىستى. كەلگەننىڭ بارلىعى دەرلىك قازاق تىلىندە جازۋلارى بار جەيدەلەردى تەگىن الدى. اشىق اسپان استىنداعى شاراعا قاتىسۋشىلار نوماد قازاق قاۋىمداستىعى دايىنداعان باۋىرساق پەن باسقا دا تاعامداردان ءدام تاتتى. كورەيالىقتار تابيعي ونىمدەردى جاقسى كورەدى، سوندىقتان قازاقستاندىق وندىرۋشىلەردىڭ بالى تانىمال بولدى. بالالارعا توعىزقۇمالاق، اسىق اتۋ ويىندارىمەن قازاقشا كىتاپتار كورسەتىلدى.
بىلتىردان بەرى جەرگىلىكتى تۇرعىندار قازاق اندەرىن تاني باستادى. بۇل - كورەيلىق ءانشى سون ۆون سوبتىڭ ەڭبەگى. ول بىرنەشە زاماناۋي قازاق شىعارمالارىن كورەي تىلىنە اۋدارىپ ورىندادى.
قازاقستانعا ەكى رەت جاساعان ساپاردان كەيىن ونىڭ رەپەرتۋارىندا حالىق ءانى پايدا بولدى.
"ماعان دومبىرا سىيعا تارتىلدى. ءقازىر مەن ول اسپاپپەن ويناۋدى ۇيرەنىپ ءجۇرمىن. قازاقستانعا بارعان سوڭ دومبىرامەن قازاقتىڭ حالىق ءانىن جازىپ الۋدى ءجون كوردىم. كەلەسى اپتادا ول مەنىڭ رەپەرتۋارىمدا پايدا بولادى"، - دەدى ءانشى سون ۆون سوب.
بيىل – قازاقستان مەن كورەيا اراسىنداعى مادەني جىل. سوندىقتان ءار اپتا سايىن كورەيانىڭ قالالارىندا قازاق مۋزىكاسى شىرقالادى. كەلەسى دەمالىس كۇندەرى پۋساندا قازاق مادەنيەتى فەستيۆالى وتەدى. وعان ەلىمىزدەن بىرنەشە انسامبلمەن ارتىستەر قاتىسادى.
"ماقساتىمىز – كورەيالىقتاردى مادەنيەت ارقىلى ورتالىق ازيا ەلدەرى تۋرالى از دا بولسا كوبىرەك ءبىلۋ. ال ءقازىر بۇل ءۇشىن بارلىق جاعداي بار. پاندەميادان كەيىن بارلىق سالادا قارىم-قاتىناستار جاقساردى. اسىرەسە، تۋريزم سالاسىندا. ەگەر بۇرىن كورەيادان قازاقستان مەن وزبەكستانعا عانا ۇشاتىن بولسا، ماۋسىمدا سەۋل مەن بىشكەك اراسىندا تىكەلەي اۋە رەيسى اشىلادى. ءبىز دە سەۋل-استانا باعىتىنىڭ قايتا جانداناتىنىنا ۇمىتتەنەمىز"، - دەدى "كورەيا-ورتالىق ازيا" ىنتىماقتاستىق فورۋمى حاتشىلىق باسشىسىنىڭ ورىنباسارى دجي چان سون.
قىزدار جاعى قازاقتىڭ ۇلتتىق زەرگەرلىك بۇيىمدارىنا قىزىعۋشىلىق تانىتتى. ال زاماناۋي ۇلتتىق كيىمدەردى ديزاينەر ايدانا وماروۆا ۇسىندى. ونىڭ وسى سالادا جۇرگەنىنە 10 جىل بولعان. ديزاينەردىڭ ماقتادان، زىعىردان جانە جىبەكتەن جاسالعان كيىمى اقش پەن ەۋروپادا تانىمال. بۇل – ايدانانىڭ كورەياداعى العاشقى كورسەتىلىمى.
"كوللەكسيالارىمىز قازاقى ناقىشتا، كۇندەلىكتى كيىپ جۇرۋگە ارنالعان. ءبىز ءقازىر تاقيالار قوسىپ جاتىرمىز. ال كيىمدى كوبىنە كۇندەلىكتى ومىرگە ارنايىلاپ شىعارىپ جاتىرمىز. سەبەبى ولار وتە ىڭعايلى، ادەمى كەز كەلگەن اق كيىمىن بولسىن ءبىر ءتۇستى كيىمنەن ۇستىنەن كيە سالسا كيىم وتە ادەمى بولىپ كورىنەدى"، - دەدى ديزاينەر ايدانا وماروۆا.