«Qazaq AIR» كومپانياسىنا التى ءجۇز مىڭ تەڭگەدەن استام اكىمشىلىك ايىپپۇل سالىندى

رەيستىڭ كەشىكتىرىلگەنى ءۇشىن جولاۋشىلاردى تاماقتاندىرماعان «Qazaq AIR» اۆياكومپانياسى 600 مىڭ تەڭگەدەن استام سوما ايىپپۇل تولەيتىن بولدى، دەپ حابارلايدى اlmaty-akshamy.kz قازاقپاراتقا سىلتەمە جاساپ.

«اقتوبە-استانا» باعىتىنداعى رەيس 4 ساعات 40 مينيتقا كەشىگىپ، جولاۋشى تاسىمالداۋشى كومپانيانى سوتقا بەردى.

اقتوبە قالالىق اكىمشىلىك قۇقىقبۇزۋشىلىق جونىندەگى مامانداندىرىلعان اۋدانارالىق سوتى قالا تۇرعىنىنىڭ شاعىمىن قارادى.

ءىس ماتەريالىنا سۇيەنسەك، «Qazaq AIR» كومانياسىنىڭ اۋە رەيسى 4 ساعات 40 مينۋتقا كەشىكتى. كومپانيا وكىلى «اقتوبە-استانا» باعىتىنداعى رەيستىڭ كەشىگۋ سەبەبىن ۇشاقتىڭ كەش كەلۋىمەن بايلانىستىردى. سوت وتىرىسىندا شاعىم تۇسىرگەن جولاۋشى رەيستىڭ كەشىكتىرىلۋىنە بايلانىستى وزىنە تاماق پەن سۋسىن بەرىلمەگەنىن ايتتى. ق ر «اۋە كەڭىستىگىن پايدالانۋ جانە اۆياسيا قىزمەتى تۋرالى» زاڭىنا سايكەس، «Qazaq AIR» كومپانياسى جولاۋشىنى تاماقتاندىرۋى ءتيىس بولعان.

الايدا تاسىمالداۋشى كومپانيا وكىلى شاعىممەن كەلىسپەدى. سول كۇنى رەيستىڭ كەشىككەنى تۋرالى الدىن الا حابارلاما بەرىلىپ، تاماق پەن سۋسىن تاراتىلاتىنى تۋرالى ايتىلعان. ال د.جانۇزاق ساعات 00.40-تا اۋقاتتانعىسى كەلگەن. ول كەزدە اكسيونەرلىك كوعاممەن كەلىسىمشارتقا وتىرعان ءدامحانا جابىق بولعان. جولاۋشىنى تاماقتاندىرۋ قيىندىعى سودان تۋعان. سوت وتىرىسى كەزىندە «Qazaq AIR» كومپانياسىنىڭ وكىلى ءىستى توقتاتۋدى سۇرادى.

سۋديا تاراپتاردى تىڭداعان سوڭ، شەشىمىن شىعاردى. سوت ۇكىمىنە سۇيەنسەك، «Qazaq AIR» كومپانياسىنا 612 مىڭ 600 تەڭگە اكىمشىلىك ايىپپۇل سالىندى.