«رۋحتى قالام قايراتكەرلەرى» ادەبي كورمەسى ءوتتى
ۇلتتىق مۋزەيدە ءتاۋەلسىزدىگىمىزدىڭ 30 جىلدىعى مەن اسا كورنەكتى اقىن مۇقاعالي ماقاتايەۆتىڭ 90 جىلدىعىن مەرەكەلەۋ اياسىندا قازاق ادەبيەتىنىڭ دامۋىنا زور ۇلەس قوسقان ايتۋلى قالامگەرلەر مەن عالىمداردىڭ شىعارماشىلىعىن ناسيحاتتاۋعا ارنالعان «رۋحتى قالام قايراتكەرلەرى» دەگەن ءبىرنەشە ءبولىمنەن تۇراتىن مازمۇندى ءىس-شارا ۇيىمداستىرىلدى، دەپ حابارلايدى Almaty-akshamy.kz.
الدىمەن مادەني جيىن «پوەزيا الىبى – مۇقاعالي ماقاتايەۆ» اتتى دوڭگەلەك ۇستەل ماجىلىسىمەن باستالىپ، اقيىق اقىندى كوزى كورگەن كورنەكتى عالىم، مەملەكەتتىك سىيلىقتىڭ لاۋرەاتى مىرزاتاي جولداسبەكوۆ، جازۋشى، قوعام قايراتكەرى التىنشاش جاعانوۆا، جازۋشى، مەملەكەتتىك سىيلىقتىڭ لاۋرەاتى ءسابيت دوسانوۆ، اقىن، مەملەكەتتىك سىيلىقتىڭ اقۇشتاپ باقتىگەرەيەۆا، بەلگىلى ساتيريك كوپەن امىربەك قىزىقتى ەستەلىكتەر ايتسا، اقىن، پارلامەنت ءماءجىلىسىنىڭ دەپۋتاتى قازىبەك يسا، قازاقستان جازۋشىلار وداعىنىڭ نۇر-سۇلتان قالاسىنداعى فيليالىنىڭ ديرەكتورى، اقىن داۋلەتكەرەي كاپۇلى جانە تاعى باسقالار كورنەكتى تۇلعانىڭ شىعارماشىلىعىنا توقتالىپ، تولعامدى ويلارىمەن ءبولىستى.
ودان كەيىن ءىس-شارالار لەگى «رۋحتى قالام قايراتكەرلەرى» اتتى ادەبي كورمەنىڭ تانىستىرىلىمىنا ۇلاسىپ، وندا مۇقاعالي ماقاتايەۆقا ارنالعان كىتاپ ينستاللياسيالارى مەن اقىن ومىرىنەن سىر شەرتەتىن مونوسپەكتاكل كورسەتىلدى.
سونىمەن بىرگە اتالعان كورمەگە ۇلى اباي اتامىزدان باستاپ، ءسابيت مۇقانوۆ، ءابدىجامىل نۇرپەيىسوۆ، ءابىش كەكىلبايەۆ، مىرزاتاي جولداسبەكوۆ، شەرحان مۇرتازا، حاميت ەرعالييەۆ، تۇرسىنبەك كاكىشيەۆ، دۇكەنباي دوسجان، قادىر مىرزا ءالى، ورالحان بوكەي، نۇرعوجا وراز، قاجىعالي مۇحانبەتقالي ۇلى، اقۇشتاپ باقتىگەرەيەۆا، حانءبيبى ەسەنقارا قىزى، ءالىبەك اسقاروۆ جانە ت.ب. اقىن-جازۋشىلاردىڭ تۇتىنعان تۇرمىستىق زاتتارى، قولجازبالارى، فوتوسۋرەتتەرى مەن كىتاپتارى قويىلىپ، كەلۋشىلەردىڭ قىزىعۋشىلىعىن تۋعىزدى.