ەسەنتاي وزەنىنىڭ ارناسى جوندەلىپ، اجارى كىرىپ قالدى
Almaty.tv سايتىنىڭ اقپاراتىنا سۇيسەنسەك، ەسەنتاي وزەنىنىڭ بويىندا جوندەۋ جۇمىستارى 2020 جىلى مامىر ايىندا باستالعان. بۇعان دەيىن قاراۋسىز جاتقان وزەننىڭ جاعاسى ءقازىر ادام تانىماستاي وزگەرگەن. ءبىر ەرەكشەلىگى – مۇندا كولىك پەن ۆەلوسيپەد جولدارى جوق. تەك 1،6 شاقىرىم تاس جول مەن 800 مەترلىك اعاشتان جاسالعان جاياۋ جۇرگىنشىلەر جولى سالىنعان.
«جاعالاۋلارىنىڭ ءبارىن بەكىتۋ جۇمىستارى، سونىمەن قاتار، جاياۋ جۇرگىنشىلەر جولى جاسالدى. وسى جولدىڭ بويىنا 3 مىڭنان استام بۇتالى اعاشتاردى ەگۋ جۇمىستارى بار. اعاشتار جانە 3 مىڭ شارشى مەتر جاسىل كوپجىلدىق وسىمدىكتەر ەگىلەدى»، – دەدى قالالىق جاسىل ەكونوميكا باسقارماسى باسشىسىنىڭ ورىنباسارى سەرىك ادىلبايەۆ.
مۇندا وزەن ارناسىن تازارتۋ جۇمىستارى دا قولعا الىنىپتى. جوندەۋ كەزىندە قوقىستان بولەك، 20 مىڭ تەكشە مەتر تاس شىعارىلىپ، قاۋىپسىزدىك شارالارى قامتاماسىز ەتىلگەن. جاعالاۋدىڭ ادام جۇرەتىن بولىگىنە سۋ جاڭا بالالار الاڭى سالىنىپ، جارىق باعاندارى مەن ورىندىقتار قويىلعان. ال ەكىنشى بولىگى تابيعي قالپىندا ساقتالىپ قالدى. بۇل قالانىڭ ءدال ورتاسىندا بوي كوتەرگەن بىرەگەي پاركتىڭ تابيعاتپەن ۇيلەسىم تابۋىنا ىقپال ەتەدى دەيدى ماماندار.
«ەڭ الدىمەن، تابيعي جەر بەدەرىن ساقتاۋ كەرەك. مىسالى، وزەننىڭ وزىندىك كۇشى بار. ەگەر سۋ تاسقىنى نەمەسە سەل بولسا، قاتتى سۋ اعىنى ءوز جولىندا ءبارىن بۇزىپ وتەدى. ال وزەن ارناسىنداعى بۇرىلىستار جوعارى جىلدامدىقپەن اققان سۋدى توقتاتا الادى. ياعني، بۇل تابيعي جولمەن قالىپتاساتىن قۇبىلىس. ال مۇندا ءدال وسى بەدەر ساقتالىپ وتىر. بۇل جەرگىلىكتى تۇرعىنداردىڭ قاۋىپسىزدىگىن قامتاماسىز ەتەدى»، – دەدى ەكولوگ تيمۋر ەلەۋسىزوۆ.
اباتتاندىرىلاتىن اۋماق كىشى الماتى وزەنىن ءبولىپ تۇراتىن دامبىدان باستاپ، وسپانوۆ كوشەسىنە دەيىن جالعاسادى. الداعى ۋاقىتتا اباتتاندىرۋ جۇمىسى بىتكەن سوڭ، جايلى ورتا قالىپتاستىرۋ ماقساتىندا قازىرگى زامانعى اجەتحانالار مەن پوليسيا پۋنكتتەرىن، بەينەباقىلاۋ كامەرالارىن قويۋ كوزدەلىپ وتىر.
«قالا تۇرعىندارىنا، قالا قوناقتارىنا، جاياۋ جۇرگىنشىلەرگە، سپورتپەن اينالىساتىندارعا، قاريالارعا ىڭعايلى قىلىپ جاسالدى. 50-دەن اسا ءۇي بار. ولاردىڭ ارقايسىمەن دەربەس جۇمىس ىستەپ، ءارقايسىنىڭ ءوز شەكاراسىن، اۋماعىن وزىنە ىڭعايلاپ، ىعىستىردىق تا، حالىققا ىڭعايلى قىلىپ، وسى جەردى دايىنداپ وتىرمىز»، – دەدى مەدەۋ اۋدانىنىڭ اكىمى اسەت ماسابايەۆ.
قالالىق جاسىل ەكونوميكا باسقارماسىنىڭ مالىمدەۋىنشە، بۇل جوباعا بيۋدجەتتەن 4،2 ميلليارد تەڭگە قارجى ءبولىنىپتى. نەگىزى، شارۋا بيىل جىلدىڭ سوڭىنا دەيىن اياقتالادى دەپ جوسپارلانعان. الايدا، مەردىگەرلەردىڭ كەپىلدەمەسىمەن تولىق قولدانىسقا 2022 جىلى كوكتەمدە بەرىلمەك. الداعى ۋاقىتتا يگى باستاما جالعاسىن تاۋىپ، ەسەنتاي جاعالاۋىن اباتتاندىرۋ مەدەۋگە دەيىن تاعى سوزىلماق. وسىلايشا، الماتىلىقتار مەن سپورتسۇيەر قاۋىم ءۇشىن قالادان تاۋعا دەيىن ىڭعايلى جاعدايدا جاياۋ سەرۋەندەۋىنە مۇمكىندىك جاسالادى.