ارتىندا ايەلى مەن 5 بالاسى قالدى
اباي وبلىسىنىڭ اكىمى نۇرلان ۇرانحايەۆ جارما اۋدانىندا كوز جۇمعان ءورت ءسوندىرۋشىنىڭ وتباسىنا قاجەتتى كومەك كورسەتىلەتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اباي وبلىسى اكىمدىگى باسپا ءسوز قىزمەتىنىڭ مالىمەتىنە سۇيەنسەك، ايماق باسشىسى ءتىلسىز جاۋمەن كۇرەستە ەرلىكپەن قازا بولعان ايدوس توعىزبايەۆتىڭ وتباسىمەن كەزدەسىپ، مارقۇمنىڭ مەزگىلسىز قازاسىنا بايلانىستى كوڭىل ءبىلدىردى.
«ايدوس ەرلان ۇلىنىڭ جارقىن بەينەسى جەرلەستەرىنىڭ جادىندا ماڭگى ساقتالادى. مارقۇمنىڭ وتباسىنا بارلىق قاجەتتى كومەك كورسەتىلەتىن بولادى»، - دەدى نۇرلان ۇرانحايەۆ.
№22 ءورت ءسوندىرۋ بەكەتىنىڭ جۇرگىزۋشى-قىزمەتكەرى ايدوس توعىزبايەۆ ازاماتتىق قورعاۋ ورگاندارىندا 2019 جىلدان بەرى ەڭبەك ەتكەن. ارتىندا ايەلى مەن 5 بالاسى قالدى.
ەسكە سالساق، وسىعان دەيىن اباي وبلىسىندا جالىن شارپىعان اۋماق 5000 گەكتارعا جەتكەنى حابارلانعان بولاتىن. وبلىستىڭ جارما اۋدانىندا 3 ءورت ءسوندىرۋشىنى كۇيىك شالىپ، ولاردىڭ ءبىرى كوز جۇمدى. دەنەسىن كۇيىك شالعان ەكى ءورت ءسوندىرۋشىنىڭ ءبىرىنىڭ جاعدايى اۋىر.
ءورت سوندىرۋشىلەر جارما اۋدانى بوزجىرا اۋىلدىق وكرۋگىنىڭ ءبىرىنشى اۋىلىندا قۇرعاق شوپتەن تۇتانعان وتپەن كۇرەسىپ جاتقان بولاتىن. ءورت ءسوندىرۋ اۆتوسيستەرناسى وتتى ءسوندىرۋ ءۇشىن سۋ جەتكىزىپ جۇرگەن كاماز كولىگىنەن سۋ الىپ جاتقان كەزدە جەل باعىتى وزگەرىپ، ءورت اۆتوسيستەرناعا قاراي لاپ قويعان. جالىن ورتاسىندا قالعان ادامدار مەن تەحنيكانى ەۆاكۋاسيالاۋ مۇمكىن بولماعان. جان-جاعىنان بيىكتىگى ەكى مەتر قاراعاش اعاشتارى جانا باستاعان.