قالدىقتاردىڭ ترانسشەكارالىق تاسىمالدانۋىنا جول بەرىلمەيدى.
بۇگىن سەناتتا «ەۋرازيالىق ەكونوميكالىق وداقتىڭ كەدەندىك اۋماعى ارقىلى ءقاۋىپتى قالدىقتاردى ترانسشەكارالىق وتكىزۋ تۋرالى كەلىسىمدى راتيفيكاسيالاۋ تۋرالى» زاڭ قابىلداندى، دەپ حابارلايدى Almaty-akshamy.kz
كەلىسىم 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارت اياسىندا جاسالعان حالىقارالىق شارت بولىپ سانالادى. ەۋرازيالىق ەكونوميكالىق وداق تۋرالى شارت وسى ەاەو-عا مۇشە مەملەكەتتەردىڭ ءۇشىنشى ەلدەرمەن ساۋدا-ساتتىقتا تاريفتىك ەمەس رەتتەۋدىڭ ءبىرىڭعاي شارالارىن قولدانۋىن كوزدەيدى.
«قازاقستاندا ءقاۋىپتى قالدىقتاردى اكەلۋ، اكەتۋ جانە ءترانزيتىن زاڭنامالىق رەتتەۋ بازەل كونۆەنسياسى جانە ەكولوگيالىق كودەكس نورمالارىمەن جۇزەگە اسىرىلادى. ەۋرازيالىق ەكونوميكالىق وداققا كىرمەيتىن ەلدەرگە قاتىستى ليسەنزيالىق ءتارتىپ قولدانىلادى. ليسەنزيا بەرۋدى مينيسترلىك 2019 جىلدان باستاپ، ياعني ول قۇرىلعاننان باستاپ جۇزەگە اسىرادى»، - دەدى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ.
سونىمەن قاتار ول جەكە تۇلعالاردىڭ جەكە پايدالانۋى ءۇشىن قالدىقتاردى ترانسشەكارالىق وتكىزۋىنە تىيىم سالىناتىنىن اتاپ ءوتتى.
«كەلىسىم تالاپتارىن ساقتاۋ ەۋرازيالىق ەكونوميكالىق وداققا مۇشە مەملەكەتتەر اراسىندا ءقاۋىپتى قالدىقتاردى وتكىزۋدىڭ ءبىرىڭعاي ءتارتىبىن بەلگىلەۋگە مۇمكىندىك بەرەدى، سونداي-اق ءقاۋىپتى قالدىقتاردى ەكولوگيالىق نەگىزدەلگەن تۇردە جويۋعا جانە قايتا وڭدەۋگە، قورشاعان ورتانىڭ لاستانۋىن بولعىزباۋعا الىپ كەلەدى»، - دەدى مينيستر.
وسىلايشا، تاراپتار وسى كەلىسىمگە جانە تاراپتار مەملەكەتتەرىنىڭ زاڭناماسىنا سايكەس، قالدىقتاردىڭ ترانسشەكارالىق ورنىنىڭ اۋىستىرىلۋىن باقىلاۋدى جانە قاداعالاۋدى جۇزەگە اسىراتىن بولادى. تاراپتار قالدىقتاردى كومۋ جانە زالالسىزداندىرۋ ماقساتىندا ولاردى ترانسشەكارالىق تاسىمالداۋىنا جول بەرمەيدى.