الماتىدا 2015 جىلدان بەرى العاش رەت №7 قالالىق كلينيكالىق اۋرۋحانانىڭ جانىنداعى جەر استى جاياۋ جۇرگىنشىلەر وتكەلى جوندەلەدى.
«قالقامان» 7 قالالىق اۋرۋحاناسىنىڭ جانىندا ورنالاسۋىنا بايلانىستى حالىق اراسىندا بۇل جەر استى وتكەلى «قالقامان» دەپ اتالادى. جوندەۋ جۇمىستارى اياسىندا كەراموگرانيتتى پليتالار ورناتتىق. ءارى ەسكى جارىق جۇيەسىن تولىعىمەن الىپ تاستاپ، انتيۆاندالدى شام ورناتامىز، بۇل جەر استى وتكەلى اۋماعىن جارىقتاندىرۋعا، ازاماتتاردىڭ قاۋىپسىزدىگىن قامتاماسىز ەتۋگە مۇمكىندىك بەرەدى. قالا اكىمى وتكەلدەردى جارىقتاندىرىپ، قاۋىپسىزدىكتى قامتاماسىز ەتۋ مىندەتىن جۇكتەدى. جاعدايدى باقىلاۋ ءۇشىن پوليسيا پۋنكتىمەن بايلانىسى بار بەينەباقىلاۋ كامەرالارىن تولىعىمەن اۋىستىرامىز»، - دەدى ناۋرىزباي اۋدانىنىڭ اكىمى نازيرا توعىزبايەۆا.
بەينەباقىلاۋ وتكەلدەگى ستيحيالىق بازارلاردىڭ الدىن الۋعا، ساداقا سۇراعان ادامداردى باقىلاۋعا، سونىمەن قاتار، ءجيى كەزدەسەتىن دۇنيە-مۇلىكتى قيراتۋ سەكىلدى بۇزاقىلىقتىڭ جولىن كەسۋگە سەپتىگىن تيگىزەدى.
«بۇرىن وتكەلدە دىبىستىق قۇرىلعىلار بولعان، ءبىراق ءقازىر ولار ىستەمەيدى، سوندىقتان ادامدار ءوتىپ بارا جاتقاندا اۋەن وينايتىنداي ەتىپ جاڭاسى ورناتىلىپ جاتىر. ءبىزدىڭ جەر استى وتكەلىنىڭ ەرەكشەلىگى، قازاقستان سۋرەتشىلەر وداعىنان تاپسىرىس الدىرعان پاننو. ول تەمىردەن جاسالادى. وندا بەينەلەنگەن قالقامان باتىر ءبىزدىڭ شاعىن اۋدانىمىزدىڭ بەينەسى ىسپەتتى بولادى. بۇل پاننودا ساۋىت-سايماندا، قالقاندار جانە ارينە، ات جارىسى ەگجەي-تەگجەيلى كورسەتىلگەن. پاننونىڭ تومەنگى جاعىندا وسى تاريحي كەيىپكەر تۋرالى كوبىرەك ءبىلۋى ءۇشىن QR كود ورناتامىز، مۇنىڭ جاس ۇرپاق ءۇشىن تاربيەلىك ءمانى زور. قاشان پايدا بولدى، قانداي الەۋمەتتىك نىساندار بار، قانداي قۇرىلىس سالىنىپ جاتىر، قانداي مەكتەپتەر مەن بالاباقشالار اشىلادى دەگەندەي جالپى، ناۋرىزباي اۋدانى تۋرالى دا بىلۋگە بولادى»، - دەدى ناۋرىزباي اۋدانىنىڭ اكىمى.
قازىرگى كەزدە اۋداندا ءۇش جەر استى وتكەلى جوندەلىپ جاتىر. جۇمىس 2023 جىلدىڭ سوڭىنا دەيىن اياقتالادى.