2024 جىلعى دەرەكتەرگە سايكەس، الماتىدا 500-دەن استام كاۋاپحانا، 417 مونشا كەشەنى (زاڭدى تۇلعالار) جانە جەكەمەنشىك سەكتوردا 12 مىڭنان استام مونشا جۇمىس ىستەگەن، - دەپ حابارلايدى Aqshamnews.kz.
مونشالاردان بولىنەتىن شىعارىندىلار كولەمى جىلىنا شامامەن 4 مىڭ توننا، ونىڭ ىشىندە جەكە سەكتورداعى مونشالاردان شىعاتىن قالدىقتار قوعامدىق مونشالارعا قاراعاندا 2 ەسە كوپ. بۇل تۋرالى الماتى قالاسىنىڭ ەكولوگيا جانە قورشاعان ورتانى قورعاۋ باسقارماسىنىڭ ساراپشىسى نازيا اۋحينوۆا ايتتى.
«شاعىن جانە ورتا بيزنەس وكىلدەرى قىزمەتىنىڭ تۇراقتى بولۋى ءۇشىن ەكولوگيالىق شەكتەۋلەردى ساقتاپ، شىعارىندىلاردىڭ تۇراقتى كوزدەرىنە سۇزگىلەر ورناتۋ بويىنشا سانيتارلىق-ەپيدەميولوگيالىق تالاپتاردى ورىنداۋ قاجەت ەكەنىن تۇسىنۋگە ءتيىس. قاتتى وتىن جاعاتىن شاعىن عانا كاۋاپحانا نەمەسە مونشا ماڭايداعى اۋا كەڭىستىگىن ونداعان، ءتىپتى جۇزدەگەن مەترگە دەيىن لاستاپ، ەڭ الدىمەن سول ماڭداعى تۇرعىندارعا قولايسىزدىق تۋدىرادى. سوندىقتان ەڭ ءتيىمدى قولجەتىمدى تەحنولوگيالارعا كوشۋ، ياعني گاز وتىنىنا نە ەلەكترگە اۋىسۋ جانە ءتيىمدى سۇزگىلەر ورناتۋ قاجەت»، – دەدى ول.
ەسكە سالايىق، بۇگىن ءماسليحات دەپۋتاتتارى الماتى قالاسىنىڭ اتموسفەرالىق اۋاسىن قورعاۋ بويىنشا جاڭا ەرەجەلەردى بەكىتتى. بۇل ەرەجەلەر قازاقستاندا العاش رەت ەنگىزىلىپ وتىر جانە مەگاپوليس ەرەكشەلىكتەرىن ەسكەرە وتىرىپ، لاستانۋدىڭ نەگىزگى كوزدەرىن رەتتەيتىن ءبىرىڭعاي كەشەندى تەتىك قالىپتاستىرادى.