الماتىدا ءماسليحاتتىڭ كەزەكتەن تىس XL سەسسياسى ءوتتى. وندا قالا ءۇشىن ماڭىزدى ءبىرقاتار ماسەلە قارالىپ، جىل سوڭىنداعى شەشىمدەر قابىلداندى، - دەپ حابارلايدى Aqshamnews.kz.
اتاپ ايتقاندا، دەپۋتاتتار الماتى قالاسىنىڭ اتموسفەرالىق اۋاسىن قورعاۋ ەرەجەلەرىن بەكىتتى. بۇل ەرەجە قازاقستاندا العاش رەت ەنگىزىلىپ وتىر جانە مەگاپوليستىڭ ەرەكشەلىكتەرىن ەسكەرە وتىرىپ، لاستانۋدىڭ نەگىزگى كوزدەرىن رەتتەۋدىڭ ءبىرىڭعاي كەشەندى تەتىگىن قالىپتاستىرادى. قۇجات اگلومەراسيا بويىنشا شەكتى جول بەرىلەتىن شىعارىندىلاردىڭ جيىنتىق تومىنىڭ دەرەكتەرىنە نەگىزدەلگەن. وعان سايكەس، جالپى شىعارىندى كولەمى – 225 مىڭ توننا، ونىڭ 189 مىڭ تونناسى تىكەلەي الماتىعا تيەسىلى. ونىڭ ىشىندە شامامەن 112،7 مىڭ تونناسى اۆتوكولىكتەردەن، ال شىعارىندىلاردىڭ 84%-عا جۋىعى ەكولوگيالىق كلاسى تومەن اۆتوكولىكتەردەن بولىنەدى.
بەكىتىلگەن ەرەجەلەر اتموسفەراعا تۇسەتىن جۇكتەمەنى كەزەڭ-كەزەڭىمەن ازايتۋدى كوزدەيدى. بۇل اۆتوپاركتەرگە ەكولوگيالىق تالاپتاردى ەنگىزۋ، III ساناتتاعى نىساندارعا باقىلاۋدى كۇشەيتۋ، تومەن شىعارىندىلار ايماقتارىن (LEZ) قۇرۋ، سونداي-اق اۋا ساپاسىن باقىلاۋ مەن سيفرلىق ەسەپكە الۋ جۇيەسىن دامىتۋ ارقىلى ىسكە اسادى.
سونىمەن قاتار، دەپۋتاتتار الماتى قالاسىنداعى جاسىل جەلەكتەردى كۇتۋ جانە قورعاۋ ەرەجەلەرىنە وزگەرىستەر ەنگىزۋ جوباسىن قاراپ، قولدادى. جاڭا وزگەرىستەر جاسىل جەلەكتەردى تۇگەندەۋ جانە كۇتۋ ءتارتىبىن ناقتىلاپ، اعاش كەسۋ مەن وتىرعىزۋ جۇمىستارىنداعى تالاپتاردى كۇشەيتەدى، سونداي-اق جەر پايدالانۋ جانە مەردىگەر ۇيىمداردىڭ ەكولوگيالىق تالاپتاردى ساقتاۋىن باقىلاۋ مەحانيزمىن كەڭەيتەدى. اعاش زاقىمداۋ مەن زاڭسىز كەسۋگە قاتىستى جاۋاپكەرشىلىك كۇشەيتىلىپ، جويىلعان جاسىل جەلەكتىڭ ورنىنا جاڭاسىن ەگۋ جانە وسپەي قالعان وسىمدىكتەردى قالپىنا كەلتىرۋ جونىندەگى ناقتى ەرەجەلەر ەنگىزىلەدى.
سونىمەن قاتار، دەپۋتاتتار «الماتى قالاسىنىڭ جول قوزعالىسى قاۋىپسىزدىگى مەن كولىك قوزعالىسىن تالداۋ بويىنشا زياتكەرلىك جۇيە» مەملەكەتتىك-جەكەمەنشىك ارىپتەستىك جوباسى اياسىنداعى مەملەكەتتىك مىندەتتەمەلەردى قابىلداۋ تۋرالى ءماسليحات شەشىمىنە وزگەرىستەر ەنگىزدى. شارتتىڭ ۇزارتىلۋىنا بايلانىستى قالادا قوسىمشا 350 «سەرگەك» كامەراسى ورناتىلادى. جول-كولىك وقيعالارىنىڭ كورسەتكىشتەرىندە وڭ ديناميكا بايقالادى: حالىق سانىنىڭ وسۋىنە قاراماستان، 2021-2025 جىلدار ارالىعىندا جول اپاتتارىنان قايتىس بولۋ دەڭگەيى ورتا ەسەپپەن 30%-عا، ال 100 مىڭ ادامعا شاققانداعى جكو سانى 10%-عا ازايعان.
سونداي-اق سەسسيا بارىسىندا 2026 جىلدىڭ 1 قاڭتارىنان باستاپ كۇشىنە ەنەتىن جاڭا سالىق كودەكسىنە بايلانىستى اۆتوتۇراقتار مەن پاركينگتەرگە سالىناتىن جەر سالىعىن رەتتەۋ ماسەلەلەرى قارالدى.
سەسسيا بارىسىندا الماتى قالاسى اۋماعىندا سىرتقى (ۆيزۋالدى) جارنامانى ورنالاستىرۋ ءۇشىن اي سايىنعى تولەم مولشەرلەمەلەرى دە بەكىتىلدى. اتاپ ايتقاندا، ءىرى فورماتتى جارناما قۇرىلىمدارى مەن جارىقديودتى LED-ەكراندار ءۇشىن ينفراقۇرىلىم مەن ەنەرگورەسۋرستارعا تۇسەتىن قوسىمشا جۇكتەمەنى وتەۋ ماقساتىندا جوعارى مولشەرلەمەلەر بەلگىلەندى، ال شاعىن فورماتتى جانە جىلجىمالى جارناما ءۇشىن تومەندەتىلگەن تولەم قاراستىرىلعان، بۇل شاعىن جانە ورتا بيزنەستى قولداۋعا باعىتتالعان.
سەسسيا سوڭىندا كادرلىق جانە ۇيىمداستىرۋشىلىق ماسەلەلەر قارالدى. ارداق بايىمبەتوۆ قالانىڭ ريەۆيزيالىق كوميسسياسىنىڭ ءتوراعاسى بولىپ سايلاندى. ول قارجىلىق باقىلاۋ جانە مەملەكەتتىك اۋديت جۇيەسىندە ەڭبەك ەتكەن، قارجى مينيسترلىگى مەن ەسەپ كوميتەتىندە باسشىلىق قىزمەتتەر اتقارعان. 2024 جىلدان باستاپ ق ر ەنەرگەتيكا مينيسترلىگىنىڭ ىشكى اۋديت دەپارتامەنتىن باسقارعان.
ءماسليحات سەسسياسىندا جاڭادان قۇرىلعان سايلاۋ ۋچاسكەلەرىنىڭ ۋچاسكەلىك سايلاۋ كوميسسيالارىنىڭ قۇرامى بەكىتىلىپ، كوميسسيا مۇشەلەرى وكىلەتتىك مەرزىمى اياقتالعانشا سايلاندى. سونداي-اق، VIII شاقىرىلىمداعى ءماسليحاتتىڭ تۇراقتى كوميسسيالارىنىڭ قۇرامىنا وزگەرىستەر ەنگىزىلىپ، 2026 جىلعا ارنالعان ءماسليحاتتىڭ جۇمىس جوسپارى ماقۇلداندى.