رەسەيدىڭ نيجنيي نوۆگورود قالاسىنداعى لوباچيەۆسكيي ۋنيۆەرسيتەتىنىڭ (ننمۋ) عالىمدارى ءبىر پرەپاراتتىڭ قۇرامىنا بىرنەشە بەلسەندى مولەكۋلالاردى بىرىكتىرە الدى. بۇل ىسىك اۋرۋلارى ءۇشىن ارالاس فوتوديناميكالىق تەراپيا (فدت) جانە حيميوتەراپيانى جۇرگىزۋگە مۇمكىندىك بەردى. جاڭا پرەپارات فدت قولدانىلاتىن تەرى وبىرى مەن باسقا دا قاتەرلى ىسىكتەردى ەمدەۋدە اسىرەسە ءتيىمدى بولۋى مۇمكىن، دەپ حابارلايدى almaty-akshamy.kz.
«فوتوسەنسيبيليزاتور مەن حيميوتەراپيالىق پرەپاراتتىڭ كومبيناسياسى مەتاستازدىق ىسىكتەردى ەمدەۋگە مۇمكىندىك بەرۋى مۇمكىن. قۇرىلعان مولەكۋلا ارەكەتىنىڭ جوعارى سەلەكتيۆتىگى ىسىك ءتىنىنىڭ ىشىندە جويىلاتىن ارنايى بايلانىستىرعىشتى قولدانۋ ارقىلى جۇزەگە اسىرىلادى»، - دەپ باياندادى ۋنيۆەرسيتەتتە.
زەرتتەۋدىڭ اۆتورى، نيجنيي نوۆگورود مەملەكەتتىك ۋنيۆەرسيتەتى حيميا فاكۋلتەتىنىڭ ورگانيكالىق حيميا كافەدراسىنىڭ دوسەنتى ۆاسيليي وتۆاگيننىڭ اتاپ وتۋىنشە، فوتوديناميكالىق تەراپياعا ارنالعان جاڭا پرەپاراتتاردى ساراپتامالاردىڭ كوپتىگىنە بايلانىستى نارىققا شىعارۋ قيىن.
«ءبىز ءقازىردىڭ وزىندە بەلگىلى جانە دالەلدەنگەن كومپونەنتتەرگە نەگىزدەلگەن كەشەن قۇردىق: ول فوتوديزاتينگە ۇقساس كوك-جاسىل بالدىرلاردان فوتوسەنسيبيليزاتور جانە زاماناۋي حيميوتەراپيالىق پرەپارات «كابوزانتينيب». زەرتتەۋ ولاردىڭ بىرىگىپ ىسىكپەن ءتيىمدى كۇرەسەتىنىن كورسەتتى. بىرىكتىرىلگەن پرەپاراتتى جاساۋ بارىسىندا دارىلىك حيميانىڭ ەڭ زاماناۋي تاسىلدەرى قولدانىلدى»، - دەپ كەلتىرەدى باسپا ءسوز قىزمەتى عالىمنىڭ ءسوزىن.