قاتەرلى ىسىكتى دەر كەزىندە انىقتاۋ - ءومىرىڭىزدى ساقتاپ قالۋ مۇمكىندىگى

الماتىدا جىل سايىن 100 مىڭنان استام ايەل سكرينينگتەن وتەدى.

28 قاڭتاردا پاپانين كوشەسى، 220، ليتەر ا مەكەنجايى بويىنشا ورنالاسقان الماتى ونكولوگيالىق ورتالىعىندا ساعات 9:00-دەن 13:00-گە دەيىن جاتىر موينى وبىرىنىڭ الدىن الۋ جانە ەرتە انىقتاۋ بويىنشا اشىق ەسىك كۇنى وتەدى، دەپ حابارلايدى Almaty-akshamy.kz

الماتى ونكوورتالىعىنىڭ ونكوگينەكولوگيا بولىمشەسىنىڭ مەڭگەرۋشىسى رايحان بولاتبەكوۆانىڭ ايتۋىنشا، گينەكولوگقا جۇيەلى تۇردە بارىپ، سكرينينگتىك تەكسەرۋدەن ءوتىپ تۇرسا، جاتىر موينى وبىرىنىڭ الدىن الۋعا بولادى، ال ەگەر ول ەرتە ساتىسىندا انىقتالسا، ونى تولىق ەمدەۋگە بولادى.

مۇندا جاتىر موينى وبىرى دامۋدىڭ باستاپقى كەزەڭىندە ەشقانداي بەلگىسى بولمايتىنىن اتاپ وتكەن ءجون.

«سوندىقتان تەكسەرۋدەن ءوتىپ تۇرۋ كەرەك. بۇل اۋرۋدىڭ بەلگىلەرى بولماعان كەزدىڭ وزىندە ىسىكتى ەرتە كەزەڭدە انىقتاۋعا مۇمكىندىك بەرەدى. اۋرۋ بەلگىلەرى پايدا بولعاننان كەيىن ىسىكتىڭ ودان ءارى تارالۋ مۇمكىندىگى تۋىنداعان كەزدە، اۋرۋدى ەمدەۋ كۇردەلەنە تۇسەدى »، - دەپ اتاپ ءوتتى ونكولوگ.

الماتىدا جىل سايىن 30 جاس پەن 70 جاس ارالىعىنداعى 100 مىڭنان استام ايەل جاتىر موينى وبىرىنا سكرينينگتەن وتەدى.

2022 جىلدىڭ وزىندە الماتىدا جاتىر موينى وبىرىنا سكرينينگتىك جاس توبىنا كىرەتىن 74098 ايەل تەكسەرىلدى. ونىڭ ىشىندە 21 ايەلدە جاتىر موينى وبىرى انىقتالسا، تاعى 538 ايەلدە ىسىك الدى جاعدايى انىقتالدى.

21 جاعدايدىڭ بارىندە قاتەرلى ىسىك ەرتە كەزەڭدە انىقتالعانى قۋانتادى.

قالا تۇرعىندارى سكرينينگتى تىركەلگەن ەمحانادا وتە الاتىنىن تاعى ءبىر ەسكە سالامىز.

جالپى، جاتىر موينى وبىرىن تولىق سكرينينگتەن وتكىزۋ اۋرۋشاڭدىقتى 80%-عا تومەندەتۋگە جانە بۇل اۋرۋدان بولاتىن ءولىمدى 70%-عا تومەندەتۋگە مۇمكىندىك بەرەدى.

«قازىرگى ۋاقىتتا جاتىر موينى وبىرىنىڭ 5 جىلدىق ءومىر ءسۇرۋ دەڭگەيى، بارلىق كەزەڭدەردەگى انىقتاۋدى ەسكەرە وتىرىپ، 70% نە ودان دا كوپتى قۇراسا، اۋرۋدى باستاپقى كەزەڭدە انىقتاۋ كەزىندە بۇل كورسەتكىش 90%-عا جەتەدى»، - دەيدى رايحان بولاتبەكوۆا.

اۋرۋدى دەر كەزىندە انىقتاۋ ۇكىم ەمەس، ءومىرىڭىزدى ساقتاپ قالۋ مۇمكىندىگى ەكەنىن ۇمىتپاڭىز!