وندىرىستەگى ءولىم قاي سالادا ءجيى تىركەلەدى؟
ق ر كاسىپوداقتار فەدەراسياسىنىڭ ءتوراعاسى ساتىبالدى داۋلەتالين ب ا ق وكىلدەرىنە «جاڭا قوعامدىق كەلىسىم: ادىلەتتى ەڭبەك قاتىناستارى» اتتى الەۋمەتتىك ارىپتەستەر فورۋمىنىڭ الدىندا وندىرىستەگى ءولىم ستاتيستيكاسىن ايتىپ بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«وكىنىشكە قاراي، ەڭبەك قاۋىپسىزدىگى كۇن سايىن وزەكتى بولىپ كەلەدى. ءبىز جىل سايىن وندىرىستە 200 ادامنان ايىرىلامىز. بۇل - جاريالانباعان جاسىرىن سوعىس دەۋگە بولادى. ونىمەن كۇرەسۋىمىز كەرەك. بۇل ىستە وتەماقى تولەۋ مودەلىنەن تاۋەكەلگە باعدارلانعان مودەلگە نەمەسە ادامداردىڭ قاۋىپسىزدىگىن قامتاماسىز ەتۋگە مۇمكىندىك بەرەتىن الدىن-الۋ شارالارىنا كوشۋدى ۇسىنامىز»، - دەگەن فەدەراسيا باسشىسى جىل سايىن تىركەلەتىن 200 ءولىمنىڭ قاي سالالاردا ءجيى كەزدەسەتىنىن ايتتى.
«ونىڭ قاي سالالاردا ەكەنىن ايتا الامىن. ءبىرىنشى - قۇرىلىس سالاسىندا، ەكىنشى - تاۋ-كەن سالاسىندا، ونىڭ ىشىندە كومىر شىعارۋ سالاسىندا تىركەلەدى. ءبىز جۇمىسشىلارى ءوندىرىس كەزىندە قايتىس بولعان كاسىپورىنداردا ءوزىمىز ساراپتاما جۇرگىزگەنبىز. سوندا بايقاعانىمىز، مۇنداي جاعدايلار كوبىندە كاسىپوداقتارى جوق جەرلەردە بولىپ جاتىر. ەكىنشىدەن، 70 پايىزى دەپ ايتا الامىن، جۇمىس بەرۋشىنىڭ كىناسىنەن بولادى. سوندىقتان بۇل دا - ءبىزدىڭ باسا كوڭىل اۋداراتىن ماسەلەمىز. جالپى، جۇمىس بەرۋشى بۇگىنگى تاڭدا وسى ماسەلەگە شىنايى كوڭىل ءبولىپ، ەسكىرىپ قالعان قۇرال-سايماندى وزگەرتىپ، ەڭبەك ادامىنا دەگەن قۇرمەتىن كوبەيتپەسە، جاعداي وزگەرمەيدى»، - دەدى ساتىبالدى داۋلەتالين.