قاتاردا فۋتبولدان ءوتىپ جاتقان الەم چەمپيوناتىندا انگليا مەن فرانسيا جارتىلاي فينالدىڭ جولداماسى ءۇشىن جاسىل الاڭعا شىقتى، دەپ حابارلايدى Almaty-akshamy.kz Inform.kz-كە سىلتەمە جاساپ.
اعىلشىندار 1996 جىلى ءوز ەلىندە وتكەن بىرىنشىلىكتە ۇزدىك شىقسا، فرانسيا 1998 جانە 2018 جىلدارى چەمپيون اتانعان بولاتىن.
ماماندار بۇل ماچتا فاۆوريت رەتىندە نەگىزىنەن فرانسيانى اتاعانىمەن، قوس كوماندانىڭ مۇمكىندىگى بىردەي ەدى. پلەي-وفتا گارەت ساۋتگەيت جاتتىقتىراتىن اعىلشىندار سەنەگالدان وڭاي ءوتتى – 3:0. ديدە دەشامنىڭ شاكىرتتەرى دە پولشانى سەنىمدى ۇتتى – 3:1.
بۇل جولى ءبىرىنشى تايمدا 17-مينۋتتا انتۋان گريزماننان پاس العان 22 جاستاعى جارتىلاي قورعاۋشى ورەلەن چۋامەني الىستان قاقپا بۇرىشىن ءدال كوزدەپ، فرانسيانى العا شىعاردى – 1:0. بۇل ونىڭ ۇلتتىق قۇراما ساپىنداعى ەكىنشى گولى ەدى.
سودان كەيىن فرانسيا ساپىندا 143ء-ىنشى ماچىن وتكىزىپ، رەكورد ورناتقان قۇراما كاپيتانى ۋگو لوريس حارري كەيننىڭ قوس بىردەي سوققىسىن تويتاردى.
ەكىنشى كەزەڭدە ۋ.لوريس 19 جاستاعى دجۋد بەللينگەمنىڭ گول سوعۋىنا مۇمكىندىك بەرگەن جوق. ايتسە دە و.چۋامەني 52-مينۋتتا ءوز ايىپ الاڭىندا بۋكايو ساكانى شالىپ جىقتى. انگليا كاپيتانى حارري كەين 54-مينۋتتا 11 مەترلىك نۇكتەدەن ءمۇلت كەتكەن جوق – 1:1. ءبىر قىزىعى، ۋ.لوريس پەن ح.كەين انگليانىڭ «توتتەنحەم» كلۋبىندا بىرگە وينايدى.
اعىلشىن قاقپاشىسى دجوردان پيكفورد تا قاراپ قالماي، اۋەلى ادريەن رابونىڭ، سوسىن وليۆە ءجيرۋدىڭ سوققىسىن قايتاردى. دەگەنمەن 78-مينۋتتا ا.گريزماننان پاس العان و.جيرۋ باسپەن قاقپانى ءدال كوزدەدى – 2:1. بۇل انتۋاننىڭ كەزدەسۋدەگى ەكىنشى ناتيجەلى پاسى ەدى.
برازيليالىق تورەشى ۆيلتون سامپايو فرانسيا قورعاۋشىسى تەو ەرناندەس الاڭعا تىڭنان قوسىلعان مەيسون ماۋنتتى يتەرىپ قۇلاتتى دەپ ەسەپتەپ، 82-مينۋتتا ەكىنشى پەنالتيدى بەلگىلەدى. الايدا ح.كەين بۇل جولى دوپتى اسپانعا تەپتى.
وسىلايشا، انگليانى 2:1 ەسەبىمەن سۇرىندىرگەن فرانسيا 14 جەلتوقسان كۇنى فينالعا شىعۋ ءۇشىن ماروككومەن تالاسادى.