كەلەشەكتە قازىرگى ءومىرىمىز تۋرالى اۋقىمدى كىتاپ جازۋ ويىمدا بار.
مەملەكەت باسشىسى قاسىم-جومارت توقايەۆ «QAZAQSTAN» تەلەارناسىنا بەرگەن سۇحباتىندا قازىرگى ءومىر تۋرالى اۋقىمدى كىتاپ جازاتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«شىعارماشىلىعىڭىزعا قاتىستى تاعى ءبىر سۇراق. ءسىز نەگىزىنەن، ديپلوماتيا، سىرتقى ساياسات تۋرالى بىرنەشە كىتاپ جازدىڭىز. سولاردىڭ ىشىندە ەلباسىنىڭ تۇلعاسىنا ارنالعان «ول تاريحتى جاساپ جاتىر» دەگەن تۋىندىڭىز بار. قازىرگى تاڭدا سول كىتاپتى جازعانىڭىزعا وكىنبەيسىز بە؟ بۇدان باسقا، جاڭا كىتاپتار جازۋ جوسپارىڭىزدا بار ما؟» - دەپ سۇراق قويدى جۋرناليست جاينا سلامبەك.
«وكىنبەيمىن. تۇڭعىش پرەزيدەنتىمىزدىڭ ەڭبەگى تۋرالى كىتاپقا كەلسەك، قازاقتا «وتكەن ىسكە وكىنبە» دەگەن ءسوز بار. مەن كوپتەگەن وقيعاعا كۋا بولعان اداممىن. سوندىقتان، قاعازعا تۇسىرگەندى ءجون كوردىم. وقىرمانداردىڭ پىكىرىنشە، كىتاپتارىم جوعارى دەڭگەيدە جازىلعان. مىسالى، ءالى كۇنگە دەيىن ستۋدەنتتەر مەنىڭ كىتاپتارىمنان قاجەتتى ماعلۇماتىن الىپ، پايدالانىپ ءجۇر»، - دەپ جاۋاپ بەردى قاسىم-جومارت توقايەۆ.
سونىمەن بىرگە، پرەزيدەنت الداعى جوسپارلارى تۋرالى ايتىپ بەردى. «كەيبىر ويلارىمدى ءتۇرتىپ قويىپ، كۇندەلىك جازاتىنىم بار. مۇمكىن، بولاشاقتا قاجەت بولار. كەلەشەكتە قازىرگى ءومىرىمىز تۋرالى اۋقىمدى كىتاپ جازۋ ويىمدا بار. اماندىق بولسا جازامىن»، - دەدى ق. توقايەۆ.