ق ر پرەزيدەنتى قاسىم-جومارت توقايەۆ «Qazaqstan» تەلەارناسىنا بەرگەن سۇحباتىندا حالىقتىڭ اراسىنداعى ەلباسى تۇلعاسىنا قاتىستى پىكىرتالاستار تۋرالى پايىمىن ءبىلدىردى، دەپ حابارلايدى اlmaty-akshamy.kz 

«ماسەلەگە جان-جاقتى قارايتىن بولساق، حالىق نارازىلىعىنىڭ استارىندا وتكىر الەۋمەتتىك ماسەلە جاتىر. حالىقتىڭ كوبىنىڭ الەۋمەتتىك جاعدايى تومەن. بۇل – اقيقات. مەملەكەتتىڭ تۇتاس بايلىعى از عانا توپتىڭ قولىندا. تەڭسىزدىك بەلەڭ الۋدا. نارازىلىقتىڭ ءتۇپ-تامىرى وسىدان باستالدى. بۇل ماسەلە تۋرالى مەن پارلامەنتتە، باسقا دا جيىنداردا ايتتىم. وكىنىشتىسى، ازاماتتاردىڭ نارازىلىعىن لاڭكەستەر مەن قىلمىسكەرلەر پايدالانىپ كەتتى. بۇعان ءبارىمىز كۋا بولدىق. راسىندا، الەۋمەتتىك جەلىدە تۇڭعىش پرەزيدەنتىمىز تۋرالى ءارتۇرلى ويلار ايتىلىپ، جازىلىپ جاتىر. قانشا ادام بولسا، سونشا پىكىر بولادى»، - دەدى مەملەكەت باسشىسى.

سونداي-اق، نۇرسۇلتان نازاربايەۆتىڭ 30 جىلدىق ەڭبەگىن جوققا شىعارۋعا بولمايدى دەپ ەسەپتەيتىنىن باسا ايتتى.

«تاريحقا قيانات جاساماۋ كەرەك. نۇرسۇلتان نازاربايەۆ – مەملەكەتىمىزدىڭ ىرگەسىن قالاعان، مەملەكەتتىگىمىزدى نىعايتۋعا زور ۇلەس قوسقان تۇلعا. ونىڭ قىزمەتىنە ءادىل باعا بەرۋگە مىندەتتىمىز. تۇڭعىش پرەزيدەنتتىڭ كەمشىلىكتەرى بولسا، ودان جاس باسشىلار ساباق الۋى قاجەت. قاڭتار وقيعاسى ەلىمىزگە دە، مەنىڭ وزىمە دە ۇلكەن ساباق بولعانى ءسوزسىز. ءتيىستى قورىتىندى جاسالدى. ءقازىر ەلىمىزدە بولىپ جاتقان ساياسي شەشىمدەر − سونىڭ ناتيجەسى. الدىمىزدا وتە كوپ جۇمىس بار. مۇنى بارلىعى كورىپ، ءبىلىپ وتىر دەپ ويلايمىن»، - دەدى پرەزيدەنت.