كەزدەسۋدە قازاقستان مەن جاپونيا اراسىنداعى ىنتىماقتاستىقتى ودان ءارى تەرەڭدەتۋدىڭ جانە پارلامەنتارالىق ىقپالداستىقتى نىعايتۋدىڭ وزەكتى ماسەلەلەرى قاراستىرىلدى.
قاسىم-جومارت توقايەۆ توشياكي ەندوعا ءىلتيپات بىلدىرە وتىرىپ، ازاماتتارىمىزدىڭ جاپون حالقىنا قۇرمەتى ەرەكشە ەكەنىن ايتتى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
مەملەكەت باسشىسى ەكى ەل اراسىنداعى سەنىمدى قارىم-قاتىناستىڭ ايرىقشا دەڭگەيدە ەكەنىن اتاپ ءوتتى. سونداي-اق جاپونيا پارلامەنتىنىڭ قازاقستانمەن دوستىق ليگاسىنىڭ ءوزارا بايلانىستاردى نىعايتۋعا قوسقان ۇلەسىن جوعارى باعالادى.
قازاق-جاپون قاتىناستارى سالاسىندا ەكونوميكالىق باعىت ماڭىزدى ءرول اتقارادى. پرەزيدەنت ساۋدا جانە ينۆەستيسيالىق ىس-ارەكەتتەردىڭ مول مۇمكىندىگىنە نازار اۋدارىپ، ەلىمىزدىڭ ەكونوميكالىق ىنتىماقتاستىقتى نىعايتۋعا مۇددەلى ەكەنىن ايتتى.
قاسىم-جومارت توقايەۆ ەلىمىزگە 8 ميلليارد دوللار ينۆەستيسيا قۇيعان جاپونيا قازاقستان ەكونوميكاسىنىڭ ەڭ ءىرى ينۆەستورلارىنىڭ وندىعىنا كىرەتىنىنە نازار اۋداردى. سونداي-اق مەملەكەتتەرىمىز اراسىنداعى تاۋار اينالىمى 2 ميلليارد دوللارعا جەتكەنىن اتاپ ءوتىپ، بۇل كورسەتكىشتى ودان ءارى ارتتىرۋ ءۇشىن مول الەۋەت بار ەكەنىن جەتكىزدى.
توشياكي ەندو كەزدەسۋگە مۇمكىندىك بەرگەنى ءۇشىن قاسىم-جومارت توقايەۆقا العىس ايتىپ، جاپونيا پرەمەر-مينيسترى فۋميو كيسيدانىڭ جولداعان حاتىن تابىستادى.
پارلامەنتتىك دوستىق ليگاسىنىڭ ءتوراعاسى جاپونيا پارلامەنتىنىڭ بارلىق سالا بويىنشا قازاقستانمەن ءوزارا ءتيىمدى سەرىكتەستىكتى كەڭەيتۋگە دايىن ەكەنىن راستادى.