قازاقستان پرەزيدەنتىنىڭ باسپا ءسوز حاتشىسى رۋسلان جەلدىباي مەملەكەت باسشىسىنىڭ كەشەگى سوچيگە جۇمىس ساپارى جايلى پىكىر ءبىلدىردى، دەپ حابارلايدى Almaty-akshamy.kz Inform.kz-كە سىلتەمە جاساپ.
«پرەزيدەنت قاسىم-جومارت توقايەۆ سوچيدە ۇزاققا سوزىلعان جەكە كەزدەسۋدەگى كەلىسسوزدىڭ قورىتىندىسىنا كوڭىلى تولاتىنىن جەتكىزدى. مەملەكەت باسشىسىنىڭ پىكىرىنشە، كەلىسسوز ءوزارا سەنىم ءارى ىسكەرلىكپەن ەرەكشەلەنگەن ايىرىقشا دوستىق اتموسفەرادا ءوتتى. پرەزيدەنت ساۋدا-ەكونوميكالىق، ينۆەستيسيالىق جانە گۋمانيتارلىق ىنتىماقتاستىققا، ەكى ەلدىڭ حالىقارالىق ارەناداعى ءوزارا ىس-ارەكەتىنە قاتىستى بارلىق ماسەلەلەر جان-جاقتى تالقىلانعانىن اتاپ ءوتتى. مەملەكەت باسشىلارى ءوز دەڭگەيىندەگى ۋاعدالاستىقتاردى ەكى ەل ۇكىمەتتەرىنىڭ تۇراقتى تۇردە جۇزەگە اسىرۋى ماڭىزدى دەپ تۇسىنەدى» دەپ جازدى رۋسلان جەلدىباي Facebook پاراقشاسىندا.
ايتۋىنشا، پرەزيدەنتتەر تۇراقتى جۇمىس بايلانىسىن جالعاستىرۋعا كەلىسكەن.
قاسىم-جومارت توقايەۆ ۆلاديمير پۋتينگە قۇرمەتى مەن قوناقجايلىعى ءۇشىن شىنايى ريزاشىلىعىن ءبىلدىردى.
ەسكە سالا كەتەيىك، كەشە سوچي قالاسىندا قازاقستان پرەزيدەنتىن ۆلاديمير پۋتين قوشەمەتپەن كۇتىپ الىپ، ەكىجاقتى كەزدەسۋ وتكىزدى.
كەزدەسۋ 2،5 ساعاتقا سوزىلدى.
باسقوسۋدا قازاقستان پرەزيدەنتى قازاقستان مەن رەسەي اراسىنداعى ىنتىماقتىڭ بولاشاعى تۋرالى پەسسيميستىك بولجامدارعا ەشقانداي نەگىز جوق ەكەنىن اتاپ ءوتتى.
«گەوساياسي احۋالدىڭ ەرەكشەلىگى ساعاتتارىمىزدى سالىستىرىپ، تەكسەرۋدى قاجەت ەكەنىن مەڭزەيدى. بالكىم ۇكىمەتتەرگە قوسىمشا تاپسىرما بەرۋ كەرەك بولاتىن شىعار. ولار بىر-بىرىمەن تابىستى جۇمىس ىستەپ، ءوزارا ارەكەت ەتىپ جاتىر. سوندا دا ءومىر شەشىمىن تابۋدى قاجەت ەتەتىن جاڭا مىندەتتەر قويىپ وتىر. جالپى اراداعى سەرىكتەستىكتىڭ دامۋىنا قاناعاتتانۋعا بارلىق نەگىز بار. بۇل تۇرعىدا سىزبەن كەلىسەمىن. ءبىزدى الەمدەگى ەڭ ۇزىن قۇرلىقتىق تولىق شەگەندەلگەن شەكارا بىرىكتىرىپ تۇر. سوندىقتان، ارينە، بولاشاعىمىزعا قاتىستى پەسسيميستىك بولجام ايتۋعا ەشقانداي نەگىز جوق»، - دەدى مەملەكەت باسشىسى.
پرەزيدەنت، سونداي-اق ەكى ەل اراسىنداعى جان-جاقتى ىنتىماقتى دامىتۋعا مۇددەلى ەكەنىن اتاپ ءوتتى.
سونداي-اق قاسىم-جومارت توقايەۆ رەسەي باسشىسىن تمد سامميتىنە شاقىردى.
ءوز كەزەگىندە رەسەي باسشىسى قازاقستان پرەزيدەنتى قاسىم-جومارت توقايەۆتىڭ شاقىرۋىن قابىل الىپ، سوچيگە كەلگەنىنە العىسىن جەتكىزدى.
قاسىم-جومارت توقايەۆ سوچي قالاسىنداعى «سيريۋس» ءبىلىم بەرۋ ورتالىعىنا باردى.