قاسىم-جومارت توقايەۆ «سامۇرىق-قازىنا» اق باسقارما ءتوراعاسىن قابىلدادى

پرەزيدەنت«سامۇرىق-قازىنا» اق باسقارما ءتوراعاسى نۇرلان جاقىپوۆتى قابىلدادى.

مەملەكەت باسشىسىنا قوردىڭ بيىلعى 8 ايدا اتقارعان جۇمىسىنىڭ قورىتىندىسى جونىندە باياندالدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.

پرەزيدەنتكە «سامۇرىق-قازىنا» اق كومپانيالار توبىنىڭ وندىرىستىك جانە قارجىلىق كورسەتكىشتەرى، سونداي-اق جىل قورىتىندىسى  بويىنشا كۇتىلەتىن ناتيجەلەرى تانىستىرىلدى.

سونىمەن قاتار قورعا قاراستى كومپانيالار توبىنىڭ ماڭىزدى جوبالارىن جۇزەگە اسىرۋ بارىسى جونىندە مالىمەت بەرىلدى.  ماسەلەن، جىل سوڭىنا دەيىن التى ءىرى جوبانى، اتاپ ايتقاندا استراحان – ماڭعىشلاق سۋ قۇبىرىن رەكونسترۋكسيالاۋ، «سارشا» جانە «جىلى جاعاجاي» ەلدى مەكەندەرىنە گاز قۇبىرىن تارتۋ، بەينەۋ – جاڭاوزەن گاز قۇبىرىنىڭ 2ء-شى جەلىسىن جانە ماقات – سولتۇستىك كاۆكاز گاز قۇبىرىنىڭ لۋپينگىن سالۋ،  ءبىرىنشى گرەس-تىڭ 1ء-شى بلوگىن قالپىنا كەلتىرۋ، قازاقستان رەسپۋبليكاسىنىڭ ءبىرىڭعاي ەلەكترەنەرگەتيكالىق جۇيەسىنە قاراستى باتىس ايماعىنداعى ەلەكتر جەلىلەرىن كۇشەيتۋ جوبالارىن اياقتاۋ جوسپارلانىپ وتىر.

بۇدان بولەك، مەملەكەت باسشىسىنا قور اكتيۆتەرىن جەكەشەلەندىرۋ جوسپارىنىڭ ىسكە اسىرىلۋ بارىسى جونىندە مالىمەت بەرىلدى. بيىل 10 قاراشاعا دەيىن KEGOC  كومپانياسىنىڭ SPO-سىن اياقتاۋ جوسپارلانىپ وتىر.

كەزدەسۋ سوڭىندا قاسىم-جومارت توقايەۆ ينۆەستيسيالىق جوبالاردى جۇزەگە اسىرۋ، سونداي-اق «سامۇرىق-قازىنا» قورىنا قاراستى بەيىندى ەمەس اكتيۆتەردى جەكەشەلەندىرۋ جانە كومپانيالارعا حالىقتىق IPO وتكىزۋ جونىندە ءبىرقاتار ناقتى تاپسىرما بەردى.