مەملەكەت باسشىسى بوكستان الەم چەمپيوناتىنىڭ جۇلدەگەرلەرىن قابىلدادى
پرەزيدەنت قاسىم-جومارت توقايەۆ بوكستان وزبەكستاننىڭ تاشكەنت قالاسىندا وتكەن الەم چەمپيوناتىنىڭ جەڭىمپازدارى – سانجار تاشكەنباي، ماحمۇد سابىرحان، اسلانبەك شىمبەرگەنوۆ، نۇربەك ورالباي جانە كۇمىس مەدال يەگەرى دۋلات بەكباۋوۆتى، سونداي-اق بوكستان قازاقستان ۇلتتىق قۇراماسىنىڭ مۇشەلەرى مەن باپكەرلەرىن قابىلدادى.
مەملەكەت باسشىسى سپورتشىلاردى الەم چەمپيوناتىنداعى جارقىن جەڭىسىمەن شىن جۇرەكتەن قۇتتىقتاپ، بۇل كۇللى ەلىمىز ءۇشىن ايتۋلى وقيعا ەكەنىن اتاپ ءوتتى.
– الەمدىك جارىستا ءتورت التىن، ءبىر كۇمىس مەدال الۋ – زور جەتىستىك. قازاق جىگىتتەرى الەم چەمپيونى اتانىپ، ەلىمىزدىڭ مەرەيىن ءوسىردى. وسى مۇمكىندىكتى پايدالانا وتىرىپ، بارلىق جانكۇيەرلەرگە العىسىمدى بىلدىرەمىن. ولاردىڭ داۋىسى سوناۋ تاشكەنت تورىنەن انىق ەستىلدى. ءدال وسىنداي شىنايى قولداۋ سپورتشىلارىمىزعا ايرىقشا كۇش بەرگەنى ءسوزسىز. سپورت دوداسىن بۇكىل حالقىمىز كوردى، سىزدەرگە تىلەكشى بولدى دەپ ايتساق، ارتىق بولمايدى. مەن دە فينالداعى جەكپە-جەكتەردى تۇگەل كوردىم. جىگىتتەرىمىز ەل نامىسىن قورعاۋ ءۇشىن بار كۇشىن سالىپ ايقاستى. جەلبىرەگەن كوك تۋىمىزبەن جانە انۇرانىمىزبەن بىرگە حالقىمىزدىڭ رۋحى كوتەرىلدى. ۇلتتىڭ اسقاق رۋحى جانە وتانشىلدىق قاسيەتى دەگەنىمىز – وسى! ويتكەنى سپورتشىلارىمىزدىڭ ءاربىر جەڭىسى ەلدى قاناتتاندىرادى. شىن مانىندە، وتكەن جەكسەنبى قازاق بوكسىنىڭ اسىعى الشىسىنان تۇسكەن كۇن بولدى. مۇحيتتىڭ ار جاعىندا جانىبەك ءالىمحان ۇلى چەمپيوندىق اتاعىن ابىرويمەن قورعادى. ونىڭ جەڭىستى جولى تاشكەنتتە جالعاستى. وسىنىڭ ءبارى بارشا قازاقتىڭ مەرەيىن تاسىتتى، – دەدى پرەزيدەنت.
مەملەكەت باسشىسى قازاق سپورتىنىڭ جاڭا بەلەسكە كوتەرىلىپ كەلە جاتقانىنا نازار اۋداردى.
– شاحماتشى ءبيبىسارا اساۋبايەۆا بليستەن الەم چەمپيونى اتاندى. تەننيسشى ەلەنا رىباكينا بەدەلدى تۋرنيرلەردە قاتارىنان بىرنەشە رەت توپ جاردى. بالۋاندارىمىز، ونىڭ ىشىندە قىزدارىمىز دا بار، ازيا چەمپيوناتىندا 7 التىن مەدال الدى. نۇرعيسا ادىلەت ۇلى اۋىر اتلەتيكادان ازيا چەمپيونى بولدى. فۋتبولشىلارىمىز، حوككەيشىلەرىمىز جاقسى ناتيجە كورسەتىپ ءجۇر. ارينە، سپورتتا جەڭىس تە، جەڭىلىس تە بولادى. دەگەنمەن ءبىزدىڭ سپورتشىلارىمىز بيىك بەلەستەردى باعىندىرىپ كەلەدى. بۇعان باپكەرلەر مەن باسقا دا سپورت ماماندارىنىڭ زور ەڭبەك سىڭىرگەنى انىق. بارشاڭىزعا شىنايى ريزاشىلىعىمدى بىلدىرەمىن، – دەدى قاسىم-جومارت توقايەۆ.
پرەزيدەنت ەلىمىزدە سپورت سالاسىن دامىتۋعا ايرىقشا ءمان بەرىلەتىنىن، جاستاردىڭ جاپپاي سپورتپەن اينالىسۋىنا قاجەتتى جاعداي جاسالاتىنىن ايتتى.
مەملەكەت باسشىسى ءسوزىن قورىتىندىلاي كەلە، سپورتشىلارعا ساتتىلىك تىلەپ، الداعى بايراقتى باسەكەلەردە ەل نامىسىن لايىقتى قورعايتىنىنا سەنىم ءبىلدىردى. سونداي-اق قازاقستان بوكس فەدەراسياسىنىڭ باسشىلىعىنا، سپورتشىلار مەن باپكەرلەرگە قازاقستان رەسپۋبليكاسى پرەزيدەنتىنىڭ العىس حاتتارى مەن قۇرمەت گراموتالارىن تابىس ەتتى.