پارتيالىق جۇمىستى قايتا قۇرۋ كەرەك.
پارتياعا سەنىم مەن ىنتىماقتاستىققا نەگىزدەلگەن قارىم-قاتىناستىڭ جاڭا مادەنيەتى كەرەك. بۇل تۋرالى AMANAT پارتياسىنىڭ سەزىندە پرەزيدەنت قاسىم-جومارت توقايەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
پرەزيدەنت پارتيا رەبرەندينگى ونىڭ اتاۋى مەن جازىلۋىن وزگەرتۋدى عانا بىلدىرمەيتىنىن اتاپ ءوتتى. ءبىرىنشى كەزەكتە بارشا پارتيالىق جۇمىستى قايتا قۇرۋ كەرەك.
«پارتيانى ترانسفورماسيالاۋ بويىنشا بۇگىن ۇسىنىلعان پىكىردى قولدايمىن. سونىمەن بىرگە، ءبىرقاتار باسىمدىقتى مىندەتتەردى اتاپ وتەمىن. بىرىنشىدەن، پارتيالىق اپپاراتتى ورتالىقسىزداندىرۋ مەن تيىمدىلىگىن ارتتىرۋ. پارتيالىق اپپاراتتىڭ جۇمىسىندا بيۋروكارتيانىڭ ەڭ ناشار تۇستارى كورىنە باستادى، ياعني جەلىلىك كەستەلەر، ەسەپتەر، فورمالدى ءىس-شارالار سايلاۋشىلارمەن ناقتى جۇمىستى ەكىنشى جاققا ىسىرىپ تاستادى»، - دەدى پرەزيدەنت.
مەملەكەت باسشىسىنىڭ پايىمىنشا، سوندىقتان ورتالىق اپپاراتتىڭ فيليالدارمەن جانە باستاپقى ۇيىمدارمەن ءوزارا ءىس-قيمىلى ادىستەمەسىن تولىقتاي قايتا قاراستىرۋ كەرەك.
«بيۋروكراتيا مەن قاعازباستىلىقتان تاباندى تۇردە باس تارتۋ ماڭىزدى. وڭىرلىك فيليالدار مەن باستاپقى ۇيىمدار وزدىگىنەن سايلاۋشىلارمەن جۇمىس ىستەۋى كەرەك. ورتالىق اپپارات ديرەكتيۆتى ءارى قولمەن باسقارۋ تاجىريبەسىن جويۋى قاجەت. ونىڭ ماقساتى – جالپى پارتيالىق ۆەكتوردى قۇرۋ، ادىستەمەلىك ءارى يدەولوگيالىق قولداۋدى قامتاماسىز ەتۋ، كادرلاردى وقىتۋ، جۇيەلى پروبلەمالاردى تالداۋ. پارتياعا سەنىم مەن ىنتىماقتاستىققا نەگىزدەلگەن قارىم-قاتىناستىڭ جاڭا مادەنيەتى كەرەك»، - دەدى قاسىم-جومارت توقايەۆ.
بۇدان بۇرىن حابارلانعانداي، بۇگىنگى سەز بارىسىندا Nur Otan پارتياسىنىڭ اتاۋىن «امانات» دەپ وزگەرتۋ تۋرالى شەشىم قابىلداندى.