ەكى ەل باسشىلارى ساۋدا-ەكونوميكالىق ىنتىماقتاستىق ماسەلەلەرىنە ەرەكشە نازار اۋداردى
مەملەكەت باسشىسى شىمكەنت قالاسىندا وزبەكستان پرەزيدەنتى شاۆكات ميرزيويەۆپەن بەيرەسمي كەزدەسۋ وتكىزدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قازاقستان مەن وزبەكستان پرەزيدەنتتەرى ەكى ەل اراسىنداعى وداقتاستىق قاتىناستاردىڭ قازىرگى جاعدايىن جانە ونى نىعايتۋ پەرسپەكتيۆالارىن ءوزارا سەنىم، دوستىق جانە تاتۋ كورشىلىك رۋحىندا قاراستىردى.
تاراپتار قاسىم-جومارت توقايەۆتىڭ بىلتىر جەلتوقسان ايىندا تاشكەنتكە جاساعان مەملەكەتتىك ساپارىنىڭ قورىتىندىسى بويىنشا قول جەتكىزىلگەن ۋاعدالاستىقتاردىڭ جۇزەگە اسىرىلۋ بارىسىن تالقىلادى.
ەكى ەل باسشىلارى ساۋدا-ەكونوميكالىق ىنتىماقتاستىق ماسەلەلەرىنە ەرەكشە نازار اۋداردى. اتاپ ايتقاندا، ءوزارا تاۋار اينالىمىن ارتتىرۋ، ينۆەستيسيا تارتۋ، ونەركاسىپ، ەنەرگەتيكا، اۋىل شارۋاشىلىعى، كولىك جانە لوگيستيكا سالالارىنداعى قارىم-قاتىناستاردى دامىتۋ پەرسپەكتيۆالارى تۋرالى ءسوز بولدى.
سونىمەن قاتار قاسىم-جومارت توقايەۆ پەن شاۆكات ميرزيويەۆ وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.
وسىعان دەيىن مەملەكەت باسشىسى قاسىم-جومارت توقايەۆتىڭ وزبەكستان باسشىسى شاۆكات ميرزيويەۆپەن بەيرەسمي كەزدەسۋ وتكىزۋ ءۇشىن شىمكەنت قالاسىنا بارعانىن جازدىق.