ق ر پرەزيدەنتى قاسىم-جومارت توقايەۆ «ورتالىق ازيا-رەسەي» سامميتىندە ايتىلعان باستامالاردى ىسكە اسىرۋ جوسپارىن ازىرلەۋدى ۇسىندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كەزدەسۋىمىزدىڭ ناتيجەسى ءىس جۇزىندە ىسكە اسىپ، ءوڭىردىڭ رەسەي فەدەراسياسىمەن ستراتەگيالىق ارىپتەستىگىنە ىقپال ەتەتىنىنە سەنىمدىمىن. ايتىلعان باستامالارعا كەلسەك، ارەكەتتەردى ۇيلەستىرۋ قاجەت بولادى. بىزدە سىرتقى ساياسات ۆەدومستۆوسى باسشىلارىنىڭ دەڭگەيىندە جۇمىس ىستەپ تۇرعان جۇمىس ورگانى بار»، - دەگەن مەملەكەت باسشىسى سىرتقى ىستەر مينيسترلەرىنە بۇگىنگى كەزدەسۋدىڭ قورىتىندىلارىن ىسكە اسىرۋ باعىتىنداعى بىرلەسكەن ارەكەتتەردىڭ جوسپارىن ازىرلەۋدى تاپسىرۋدى ۇسىندى.
«سونداي-اق، ورتالىق ازيا مەملەكەتتەرى مەن رەسەي فەدەراسياسى باسشىلارىنىڭ بىرلەسكەن مالىمدەمەسىن جاريالاۋ ۇسىنىلادى»، - دەدى مەملەكەت باسشىسى.
ايتا، كەتەيىك سامميتكە قازاقستان، قىرعىزستان، وزبەكستان، تاجىكستان، تۇرىكمەنستان جانە رەسەي پرەزيدەنتتەرى كەلدى، ولار التىجاقتى فورماتتاعى ىنتىماقتاستىقتىڭ كەلەشەگىن تالقىلاپ جاتىر.